Tunlai khawvel huapa hla lar ber pahnih chu hla hlui ve ve niin, Michael Jackson hla hlui ‘Billie Jean’ chuan Justin Bieber leh Nicki Minaj te hla hlui tho ‘Beauty and a Beat’ chu Billboard Global 200 chart No.1-ah a rawn lan.
An tlangzarh atanga kum 43 chuang a vei hnuah Michael Jackson “Billie Jean’ chu kar khat chhunga khawvel huapa hla lar ber rawn niin, Billboard Global 200 chart No.3 atangin No.1-ah a invawrh kai ta. He hla hi Michael Jackson biopic ‘Michael’ tih film cinema hall-a an tihchhuah atangin a rawn lar thar leh a, kar thum liamta khan he chart-ah hian No.65-ah a rawn lang a, a film cinema hall-a kar li an chhuah tlin meuh chuan a rawn No.1 ta a ni.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian kar khat chhunga ram hrang hrang 200 chuanga official-only stream (subscription leh ad-supported audio leh video music services) leh download sales te chu tehna pawimawh a ni.
‘Billie Jean’ hian kar khat chhungin stream maktaduai 51.5 leh sales 3,000 nei lehin, hei hi chart-ah No.3 atangin No.1 a kaipui ta a, Michael Jackson hlaa he chart-a No.1 kai thei thei hmasa ber a ni. He chart hi September 2020 atanga an tih tan chauh a ni.
Michael Jackson hian 2009 khan mual a liam tawh a, a tunah he chart-a No.1 kai thei hla a rawn nei ta a, ‘Billie Jean’ hian record siamin, he chart-a No.1 ni thei zinga hla upa ber a la ni a, he hla hi MJ album ‘Thriller’ a hla niin, a album hi November 1982-a tlangzarh a ni a, a vanglaiin he hla hi Billboard Hot 100 (US singles) chart-ah kar sarih (March-April 1983) a No.1 thei nghe nghe a ni.
He chart-a No.1 ni thei zinga hla upa ber dawttu chu Wham! Krismas lengzem hla “Last Christmas” niin, 1984-a an tlangzarh kha a ni a, nikum Krismas vuakvetah khan kar khat a rawn No.1 zuai a, a dawt leh chu Kate Bush hla, 1985-a tlangzarh tawh “Running Up That Hill (A Deal With God)’ niin, a palina chu Mariah Carey Krismas lengzem hla “All I Want for Christmas Is You” niin, 1994-a tlangzarh a ni a, a pangana chu Justin Bieber “Beauty and a Beat’ featuring Nicki Mianj, 2013 a tlangzarh a ni ve
Michael Jackson ‘Billie Jean’ a lar ber
