Daily Newspaper

Microsoft-in Hacker-ten inthlan tihbuai an tum a ti

8

Hackers te Russia, China leh Iran nena inzawmna nei te chuan US 2020 presidential election neih turah mimal leh pawl te hack tumin chet an la niin Microsoft chuan a sawi.

Russian hackers te kum 2016 Democratic campaign hack-tute chu an inrawlh leh tiin tech firm te chuan an sawi bawk a.

Microsoft chuan ‘foreign activity group ten nasa takin’ inthlan tihbuai tumin hma an la leh mek tiin a sawi bawk a.

President Donald Trump leh Democrat Joe Biden campaign te chu an thlurbing ve ve niin an tarlang bawk.

Russian hackers Strontium group te chuan organisation 200 chuang an bitum a, a tam ber te hi US political party-te nena inthlunzawmna nei niin Republicans leh Democrats te an khawih tel ve ve tiin Microsoft chuna thuchhuah an siamah an tarlang a.

Heng hackers te tho hian British political party te pawh an bitum bawk tiin Microsoft te chuan an sawi bawk.

Strontium hi Fancy Bear tia hriat hlawh an ni bawk a, Russian military intelligence GRU cyber-attack unit te hnuaia inziaklut nia sawi an ni.

“Kum 2016-a kan lo hriat tawh angin, Stonrium te hian mimal account khawih buai tumin chet an la nasa a ni,” tiin Tom Burt, Microsoft Vice-President, customer security and trust unit in-charge chuan a sawi.

Chinese hackers te chuan Biden campaign nena inthlunzawmna nei mimal an thlurbing a, Iranian hackers te chuan Trump campaign team te an thlurbing thung tiin Microsoft chuan a sawi bawk.

Mahse, cyuber-attack tam ber te hi a hlawhtling lo tiin Microsoft chuan a sawi bawk a. Voting system buaipuitu group te chu an bei ve lo tiin a sawi bawk.

“A hmaa cyber-attack ang thovin candidate te chauh ni lo campaign staffers te bakah issue pawimawh dang te an thlurbing a ni,” tiin Burt chuan a sawi.

“Heng avang tak hian mimal leh pawl te politics thila inhnamhnawih te chuan anmahni inven nan a thlawna neih mai theih low-cost security tools te an hman a ngai a ni,” tiin Burt chuan a sawi bawk.

Microsoft te chuan Chinese group te chuan Biden campaign team te mimal email account bakah Trump Administration a mi pawimawh tak pakhat an thlur bing thu an sawi a.

Anni bakah hian Chinese hacking group Zirconium te chuan khawvel huapa mimal langsar , academic institution leh policy organisation te an thlurbing tiin an sawi bawk a.

Iranian group te hi Phosphorus tih niin White House official-te hack an tumnaah an hlawhchham tawh a, May leh June thla khan Trump campaign staff te hack an tum pawh an hlawhchham tawh bawk.

Microsoft chuan Russian, Chinese leh Iranian hackers te tum ber hi an hrefiah thei mai lo an ti thung a. Google te pawhin June thla khan China leh Iran in hack an tum thu an lo sawi tawh.

Trump campaign deputy national press secretary Thea McDonald chuan, “Kan lian em a, tum bik kan nih kan hria a, mak kan ti lo,” tiin a sawi a.

Biden campaign official te chuan, “A tir phat atangin hetiang hi kan tawn kan rinsa a ni a, kan inpuahchah tha a ni,” an ti bawk.

Trump administration in eng nge a sawi?
Department of Homeland Security’s top cyber-official, Christopher Krebs chuan Microsoft thusawi hi US intelligence community tena an lo sawi lawksa tawh a nih thu a sawi a.

“Hackers tena an tum bik te hi operating voting infrastructure a inhnamhnawihna nei lo vek an ni a, hei vang hian election system ah nghawng a nei lovang,” tiin Krebs chuan a sawi.

Ningani khan Trump administration chuan Russian national pakhat chu US political process tihbuai tumah puhin an man thung a.

US Department of Treasury chuan Moscow nena inthlunzawmna nei Ukranian lawmaker Andrii Derkach chu hetianga inhnamhnawiha puhin an hrek zui bawk.

US intelligence ten eng nge an sawi?
US intelligence community te chuan August thla khan China, Russia leh Iran te chaun US presidential election tihbuai tumin chet an la mek an lo ti tawh a.

Russia chuan Biden chu tihhniam tumin chet a la a. China leh Iran te chuan Trump a chak loh nan chet an la an ti bawk.

US intelligence te chuan Iran chuan US democratic institution leh president te chu online hmanga tihhminghliau an tum thu an lo sawi tawh bawk.

Kum 2016-a thil thleng kha?
Kum 2016 khan US intelligence agencies te chuan Russia chuan Hillary Clinton tihchhiat tumin Russia sorkar chetlakna hmang ngeiin cyber attack leh fake news story te social media-ah an vawrhdarh nasat thu an lo sawi tawh a.

Special Counsel Robert Mueller an investigation a neihah Russian hackers te chuan Democratic National Committee systems bakah Clinton campaign chair John Podesta personal email te an hack thu a sawi a. Heta tang hian email sing tam tak an tiputru zui ta a ni.

A hnuah Facebook pawhin Russian-backed content te chu inthlan dawn velin platform hrang hrangah American maktaduai 126 te thlir theihin thehdarh niin a sawi bawk.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy