Sawrkar laipui ruahmanna, zirlaite hnena chaw chhun (mid day meal) pek thin chu a dawng thei naupang zawng zawng hnena an pe thei lo a nih chuan, kumin June 30 atang chuan state sawrkarin zaa 33 a tum a ngai tawh dawn.
PM POSHAN state nodal officer Lalsangliana chuan Nilainia Saituala he scheme chungchanga zirtirtu hriat tur tul inhrilhnaah, MDM (Mid-Day Meal) ah Mizoram pumah tan lak a ngai tih a sawi a; June 30 ralhmaa MDM hi 100% a pek an nih loh chuan central-in 33% chu state sawrkarin a tum a ngai tawh dawn tih a rawn sawi a; June 30 ralhma ngeia MDM hi 100% a pe ngei tura theihtawp chhuah a ngai a, chu chu zirtirtu an inkokhawm chhan pawh a ni tih a sawi.
MDM pek chungchangah Mizoram hmun thenkhat atanga network connectivity-a harsatna awm thin anga chhuanlam awm thin chu tha lo a tih thu leh a tam zawkah chuan thawktute an tan mar tawk loh vang a nih thin thu a sawi bawk.
School Education director ni bawk Lalsangliana chuan, zirtirtu indaihloh tia sawi thinah RTE-in zirlai mila zirtirtu awm zat tur a sawi nen chuan Mizoram chu la ziaawm tak kan ni tih a sawi. “Udise-plus portal hmangin zirtirtu leh naupang awm dan, school dinhmun a hriatin a hmuh theih vek a, sawrkar sum dinhmun thlir chungin rualkhai thei ang bera semrual thin a ni,” a ti.
PM POSHAN inhrilhhriatnaah hian Saitual Block huamchhung tangin primary school 40 leh middle school 36 zirtirtu bakah Ngopa Block atangin PS 17 leh MS 16 zirtirtu an tel a ni.
Mid day meal 100% pek loh chuan centre-in tumsak lo ang
