Midang tana hnute tui thawh hnem record siam
Fa pahnih nei tawh Aloha, Oregon, USA-a cheng Elisabeth Anderson-Sierra chuan hnute tui donate tam ber record a siam a, a hnute tui liter 1,599 milk bank-ah a thawh tawh a, heng a hnute tui thawh te hi February ni 20, 2015 leh June ni 20, 2018 inakar a thawh vek an ni. Heng a hnute tui thawh avang hian nausen thla kim loa piang tam tak nunna a chhanhim niin an sawi.
Elisabeth chuan, “Guinness World Record hian milk bank-a ka hnute tui thawh chiah an chhiar a, milk bank bakah thenawm hnai chhungkaw eng emaw zat tan ka thawh tawh bawk,” a ti.
Kan ramah ngei pawh nu thenkhat hnute tui nei lo leh nausen nu ten an thih san, hnute hnek tur nei lo ten an thenawm hnaia naupawm lai hnute an chhim tak thu hi hriat tur a awm ve nual. Hetiang deuh bawk hian Elisabeth pawhin hnute hnek tur nausen te tan a hnute hi milk bank-ah a thawh thin a ni.
Hetiang a tih theihna chhan pakhat chu hyperlactation syndrome a neih vang a ni a, hetiang syndrome nei te chu an hnute tui a tam bik em em a, ama tawk pawhin a put leh mai thin a ni. Elisabeth chuan, “Ka taksain hormone chi khat prolactin a siam chhuak hnem a, chu chuan hnute tui a ti tam ta em em mai a ni,” a ti.
A hnute tui hi a sawr chhuahna khawl hmangin an sawr chhuak a, chu chu a dahna tur bur thianghlimah dahin, milk bank-ah an dah a, chu chu a mamawh ten an lo hmang ve leh thin a ni.
Midang tana hnute tui thawh hnem record siam
