Ruih atana siam ruihhlo a hluar a, hei chu tlang hriat a ni ang. Ruih atana siam ni lo pawh an rui nasa a, mihring tana siam damdawi pawh tunlaiin a hluar tlat mai!
Mizoram Excise & Narcotics (MEN) department-in damdawi hi a hluar an ti a, police-te pawhin a hluar an ti. Food and Drugs Administration (FDA) lam pawhin a hluar an ti.
A man thinte chuan khuh damdawi leh khuh damdawi ni lo damdawi chi dang a hluar an ti a, dam lote tana siam damdawi rui thin an tam an ti!
An sawi danin, khuh damdawi ni lo, dam lo ei tur damdawi chi hrang hrang, alprazolam te, nitrazepam te, clonazepam te, tramadol te a hluar a, hetiang damdawi hi heroin hluar nen a inzawm.
“Heroin ti thinte’n khuh damdawi ni lo damdawi chi dang hi an uar a, heroin tichak turin an duh a ni ber mai a. Heroin nen an khawih pawlh a, man tur pawh a tam,” MEN department hotu pakhat chuan a ti.
Khuh damdawi hi heroin ti lote zingah a hluar ve thung tih a sawi a, “Inthup chunga ruih atan khuh damdawi hi an duh a. Mi pangngai tak tak anga kan ngaihte’n an uar a, a langsara rui pawh an awm tho rualin engmah rui ngai lo anga kan ngaihte’n khuh damdawi hi an uar bawk a. Ruihhlo ti loe’n an rui,” a ti.
Medical Representative te’n khuh damdawi leh damdawi chi dang hi an hralh nasa tih an sawi a, doctor lehkha nena lei tur ni mah se doctor lehkha tel lova lei tur a tam tih an sawi.
Khuh damdawi hi daka chah an lo tam a, dak in lamin mak an ti a, MEN department hnenah an thlen rawih tawh. MEN department lamin an ngaihven a, dak in atanga lain, ‘A chahtute’n way bill kengin a lak theih e,’ an ti a, la ngam lo an tam an ti!
Damdawi dawr lian lovah pawh khuh damdawi hi a lei theih a, a hlawma hralh chhuak thin tih an sawi.
Health & Family Welfare department hnuaia Food & Drugs Administration (FDA) lam pawhin khuh damdawi a hluar tih an sawi a, damdawi dawrah dan zawm leh zawm lo an awm a, zawm tum lo pawh an awm an ti.
June thlaah khan khuh damdawi khuahkhirhna khauh zawk an siam a, wholesaler-in an lakluh theih zat tur leh retailer-in wholesaler hnen atanga an lak theih zat te an bituk. Dawr tam takin an zawm laiin a zawm lo an awm tih an sawi a, licence tihtawpsak (cancel) pawh an nei.
Khuh damdawi hi MEN department-in kuminah July ni 23 thleng khan phial 8549 an man tawh a, alprazolam mum 27,589, nitrazepam mum 10,322, clonazepam mum 3,371, tramadol mum 5375 an man tawh.
Mihring tana siam damdawi a hluar!
