Daily Newspaper

Milan in hma an hruai fal

8

Pathianni zana Italian Serie A khelhah hmahruaitu AC Milan chuan khualmualah Sampdoria an hneh a, hmahruai zui zel in, point nga in an sang fal tawh.

Italy tualchhung mai ni lo, Europe-ah pawh football club ropui ber zinga mi AC Milan chu an ropuina luah let leh turin an kir mek a. Hun rei tak chhung inelna liana an champion theih loh hnuin Serie A lamah ropui takin an inlan mek a. Season tharah tlawm an la nei lo. AC Milan hian point ngaa hmahruai fal turin khualmualah phu takin hnehna an chang a, hma an hruai fal deuh deuh zel.

Sampdoria muala inkhel hmuhnawm takah hian hun chanve hma lam tawp dawn tep, minute 45-naah mikhual team Milan chuan Jakub Jankto handball vangin penalty an hlawhchhuak. He penalty hi Franck Kessie chuan a pet goal. Franck Kessie goal thunna inkhelah Milan an vannei thei hle a, vawi 19-ah tlawm an nei lova, Kessie goal thunna inkhe 16 ngawtah chak zawk an ni nghe nghe a ni. Franck Kessie goal thun hi minute 77-naah Castillejo Azuaga chuan a chhunzawm a, an hmahruaina a ti zau. Hun tawp dawn hnaih minute 82-ah mualneitu Sampdoria tan Albin Ekdal chuan goal thunin an si phurh sut then mahse an tlawm zui ta tho a ni.

Kum 2010-11 hnu lama Serie A trophy la chawi leh miah lo AC Milan hian 2020-21 season-ah bul an tan tha viau a, vawi 10 khel tawhin tlawm an la nei lova, point 26 hmuin hma an hruai fal mek. Inter Milan, Napoli leh champion lai Juventus te chu an mahni hnaih zualtute an ni.

Serie A-ah pathumna luah mektu Napoli chuan pathianni zan vek khan khualmualah Crotone an hmachhawn a, si li fai ngawtin hnehna an chang.

Napoli tan hian Lorenzo Insigne, Hirving Lozano, Diego Demme leh Andrea Petagna ten goal an thun a. Mualneitu lam hian minute 40-na leka Jacopo Petriccione hnawhchhuah a ni chu an tuar hle a ni.

Inrinni zan khan Inter Milan leh Juventus te an inlan ve thung a, an mualah hnehna an chang ve ve. Inter Milan hian an mikhual Bologna chu Achraf Hakimi goal hnih leh Romelu Lukaku goal khat hmangin an hneh a. Juventus chuan an mikhual Torino lakah si an phurh hmasak zet hnuin Weston McKennie leh Leonardo Bonucci te goal thun hmangin an chak let a, point thum hlu tak an hlawhchhuak ve bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy