NBA (basketball) inkhel entute thut thin dan angin AC Milan pawhin khelmual sir hnaite atanga an team inkhel lai en theih turin ruahmanna a kalpui a, NBA-style pitchside seat an tih ang zulzuiin Milan fans chuan hnai set sawt atangin an pawlte inkhel an en thei tawh.
Milan hian San Siro stadium chu NBA inkhel enna seat an siam dan kalphung entawnin an duang thar a, Italian club thuchhuah chuan an seat thar siam hmangin khelmual thlir theihna hnaiber an chhawpchhuak tih an sawi a, court sir chet atanga basketball game an thlir hual luih angin fans tan line hnaih tak atangin inkhel an en theih tih an tarlang.
Karliamta Ningani Europa League inkhel pakhata sikhat faia AS Roma an hneh tum khan AC Milan hian an khelmuala seat thar hi chhawpchhuakin, Italian rapper lar pahnih Ghali leh Blanco-te chu thutthleng thara thu hmasaber tura an mikhual sawm zingah telin, an pawlte inkhel en tura milar an sawm pawh hi NBA kalphung tho niin, pop star leh milar tak takin NBA inkhel hi seat tha ber ber luah chungin an thlir thin a nih kha.
Club hrang hrangte pawhin an fan-te tana player hnaih lehzual theihna tur hian ruahmanna an kalpui ve fo a, Manchester City chuan an khelmual Etihad Stadium-ah ‘Tunnel Club’ an tih chu siamin, inkhel tan dawnah player-te chuan darthlalang langtlang thei kualchhung (glass ‘tunnel’) kaltlangin khelmual an lut a, an kalkawng sirtuak atangin fans lamin chetzia hmangin duhsakna leh lawmna an lo hlan thei a ni.
Milan inkhel thlir hnai duh kan awm a nih chuan a hma lama ticket ngaihven a tul dawn niin a lang a, a chhan pawh kum 1926 atanga an lo luah tawh San Siro atanga insuanchhuah hi an tum hnai ve tawh a, Serie A club hian an khelmual ropui chhuahsana Milan khawpui chhim lama seat 70,000 awmna tur stadium thar puah an tum thu an lo nemnghet tawh a ni.
Hetih lai hian Milan khaw team dang Internazionale pawhin AC Milan nena an inluahtawm kumkhua San Siro kalsana hmun danga an pual tur khelmual sak an tintuah ve mek bawk.
Milan inkhel a thlir hnaih theih
