Uefa Champions League league stage match rukna khela chechhuak Milan club pahnih AC Milan leh Inter Milan chuan Nilaini zanah hnehna chang ve vein, play-off khelh buai ngai loa round of 16 luh nghal theihna top-eight chin luah pha turin dinhmun tha takah an ding ve ve.
AC Milan 1-0 Girona
Internazionale nena an khelmual intawm Stadio Giuseppe Meazza chhunga mipui 66,030 zet pungkhawm hmaa Milan chakna goal awmchhun hi first half minute 37-a Rafael Leao tihluh niin, Portugal forward Leao Ismael Bennacer-a through ball vawrh umlutin goal awmchhun a thun.
Spanish club tan Bryan Gil chuan darkar khat ankhelh tlin hma hretin an siphurh sutna goal tilut ve bawk mah se offside avangin hnawlsak a ni.
Leao hian second half tir lam deuhah goal dang khung belhna hun remchang hmu mah se tuntum chu Girona goalkeeper Paulo Gazzaniga tana hna khirh thlen zo loin goal ban sirah a thlawkchhuak.
Italian club lian Milan hian point 15 hum chungin table-ah parukna an luah a; automatic qualification hmun chan phakna huang luah chungin karleh hian an league phase match hnuhnungberah Croatian club Dinamo Zagreb an luhkhung leh ang.
La Liga club Girona thungin point thum chiah an la hmuh avangin an tan two-legged play-off stage luh ngaihna pawh a awm ta lo.
Sparta Prague
0-1 Inter Milan
Top-eight spot luah tura point khat chauh mamawh tawh Inter chuan Prague khawpuiah rim taka thawkin point thum hlu zet an thawkchhuak a, point 16 nen table-ah palina an luah vang tawh.
2023 runners-up Inter hian tun season-a European game sarih an khelh tawh atangin goal khat chiah an la chhuah a, epet ARENA chhunga fans 18,010 lek pungkhawm hmaah pawh an lama goal lut tur an hum tluan leh thei.
Simone Inzaghi team hian an league phase game hnuhnungberah karleh hian Monaco an mikhual dawn a, an chung chiaha thu Arsenal chak zo loin, pahnihna Barcelona tlawm bawk se pahnihna dinhmuna tawlh chho chungin Inter hian round of 16 an lut tawh dawn a ni.
An final match-a Bayer Leverkusen an tlawh hma hauh pawhin Czech First League club Sparta Prague chu Champions League kal lai atangin an tla fel ta a; khelh sariha point li hum chungin table-ah 29-na an luah.
Milan team pahnih nuih zan
