Miley Cyrus hla thar ‘Flowers’ chu Billboard Hot 100 (singles) chart No.1-ah a debut a, he chart-a hla No.1 kai thei pahnih a neihna niin, 2013 khan a hla hit ‘Wrecking Ball’ a lo No.1 tawh bawk a ni. Hetihrual hian Bizarrap leh Shakira ‘BZRP Music Sessions, Vol.53’ chu chart top 10-ah a debut ve bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre U.S. streaming (official audio leh official video), radio airplay leh sales data te chu tehna pawimawh a ni.
Miley Cyrus ‘Flowers’ hi kar khat chhungin US-ah stream maktaduai 52.6 tlingin, 70,000 an hralh thei bawk a, radio airplay-ah pawh ngaithlatu maktaduai 33.5 nei angin an chhut a, hei hi chart-ah a No.1 pui ta a ni. ‘Flowers’ hi Miley hian January ni 13 khan a tlangzarh a, chu chu a pasal hlui Liam Hemsworth pianchampha tak a ni lehnghal. He hla hi Miley studio album pariatna, March ni 10-a a tlangzarh tur ‘Endless Summer Vacation’ atanga a single a ni.
Miley hian Hot 100 chart-a top 10 kai thei hla 11 a nei tling ta a, May 2021-a The Kid Laroi ‘Without You’ a sakpuina avanga chart No.8 a kai hnua he chart top 10-a a lan lehna hmasa ber a ni bawk. Chart No.1 kai thei hla pahnih a neihna a nih rualin, hlaphuatu anga chart No.1 kai thei hla a neih vawi khatna a ni thung. ‘Flowers’ hi Aldae (Gregory Hein) leh Michael Pollack te nena an phuah ho a ni a, ahla No.1 kai thei dang ‘Wrecking Ball’-ah kha chuan a phuahtu zingah a hming a lang lo.
SZA ‘Kill Bill’ cu stream maktaduai 34.9, sales 2,000 leh radio airplay-ah ngaithlatu maktaduai 29.4 neiin, chart No.2-ah bawk a awm leh a, chart No.1 hlui Taylor Swift ‘Anti-Hero’ chu No.1 atangin No.3-ah a tawlh ta a, Metro Boomin, The Weeknd leh 21 Savage “Creepin'” chu No.5 atangin No.4-ah a insawn a, chart No.1 hlui Sam Smith leh Kim Petras ‘Unholy’ chu No.3 atangin No.5-ah a tawlh a, David Guetta leh Bebe Rexha ‘I’m Good (Blue)’ chu No.4 atangin No.6-ah a tawlh ve ta bawk. The Weeknd ‘Die for You’ chu No.6 atangin No.7-ah a tawlh a, Drake leh 21 Savage ‘Rich Flex’ cu No.7 atangin No.8-ah a tawlh ve ta bawk.
Bizarrap leh Shakira ‘Bzrp Music Sessions, Vol. 52’ cu stream maktaduai 20.9, sales 9,000 leh radio airplay-a ngaithlatu maktaduai 7.9 neiin, No.9-ah a debut. Bizarrap tan he chart top 10-a a lan vawi khatna niin Shakira tana pangana a ni a, 2007 hnua chart top 10-a a lan lehna hmasa ber a ni a, top 10-a a lan hnuhnun ber atanga kum 15 leh thla 9 hnuah a rawn lang ve ta chiah a ni.
Chart top 10 khartu chu No.1 hlui Harry Styles ‘As It Was’ niin, No.8 atangin No.10-a a tawlh ta. He hla hi kar 15 chhung No.1 ni thei a ni a, Hot 100 history-ah chart No.1 nih rei theihah palina a ni pha bawk