Hnamdangten mumal zawka inner line permit an hman theih nan, sawrkarin a buaipui tur bik ILP Board din turin sumdawngte intelkhawmna pawl – Mizoram Merchant Association (MIMA) chuan a ngen.
MIMA hruaitute hian Home minister K Sapdanga an hmu a. ILP mumal neiloa Mizorama hnamdang lo lut an tam thu leh hnamdang sumdawngten ‘2 years ILP validity’ an neih chuan an sumdawng mai zel chu tha lo an tih thu an thlen a. ILP chungchang hi felfai taka vawn a, kalpui a nih theih nan sawrkarin ILP Board din turin an ngen. Minister hian a tul anga bawhzui a tum thu a hrilh a ni.
An sumdawnna kawnga pawimawh, bungrua loading leh unloading hun, SP Traffic Aizawl-in a siamah harsatna an tawh thu Home minister hnenah hian an thlen a. Holiday leh Inrinni khuahkhirh lo tur leh ‘peak hour’ ah – zing dar 8.30 atanga chawhma dar 10 leh, tlai dar 4 – 6 inkar hmang turin an thlen.
Holiday leh Inrinni hi lirthei zawng zawng pawh tlan tir vek an ni a; peak hour chhungah hian school naupang leh office kalte an kal leh haw zawh tawh vek thu sawiin, lo enzui a tiam avangin lawmawm an tih thu MIMA hian an sawi.
Income Tax department-in sumdawngte lehkha an pek chungchangah MIMA hruaitute hian ukil an hmu nghal a. General-a chhan phawt nise, chumi hnuah a tul ang zela hma lak nise an ti.
MIMA-in ILP Board din ngen
