Daily Newspaper

Mimbung-in Aizawl Fairel Bel-ah chawhmeh chhunglut

13

Aizawl district bawrhsap hmalaknaa buatsaih ‘Fairel bel’ kaltlanga chhawmdawl ngaite tana luangchhuak hmasa ber ni turin Inrinni khan Mimbung kawtlang chuan chawhmeh chi hrang hrang thahnem tak an chhunglut.

Mimbung khua hian thlai chi hrang hrang – bawkbawn, samtawk, berul, antam, rawtuai, lakhuihthei leh fanghma te Aizawl bawrhsap kutah an hlan a, hlan tur hian Mimbung atangin task force aiawh, YMA aiawh, MHIP aiawh leh Aizawla an association hruaitute an kal a. Chawhmeh hi tipper pahnih leh pik-up pahnih khat an phur thleng a ni. Heng chawhmeh hi DC office chuan lo dawngin, lawmthu sawi nan damdawi leh a hmanrua chi hrang hrang bakah a tul anga khawtlang tana hman tur sumfai an hlanlet a ni.

Mimbung khua hi an khuaah Covid-19 hri a luh avangin May 20 khan containment zone-ah puan a ni a, thla khat chuang containment zone-a puan an nih chhungin an khaw thenawmte hnen atangin tanpuina an dawng nasa a, ngaihsaktu an nei tha hle tih an sawi. Hei vang hian khawtlang mipui chuan Aizawl district lamah luanchhuah ve ngei ni se, tiin rilru an siam tih an sawi a ni.

Mimbung khawtlang hnen atanga chawhmeh chi hrang hrang thlengte hi Aizawla veng 30 chuangah semchhuah nghal a ni a, he puihna dawng tur hian khawpui chhunga cheng khawsak harsa zual, mahnia chawhmeh leina harsate task force kaltlanga khawnkhawm a nih bakah mahnia thlai tharchhuah nei lo veng te, Chief Minister’s Relief Fund dawng tura thlanchhuah tamna vengte ngaih-pawimawh zual an ni. Heng veng thlanchhuah chhunga cheng chhungkaw mamawh zual hnenah chawhmeh hi an task force theuh kaltlanga pek an ni.

Tunhnai khan Aizawl bawrhsap hmalaknain Aizawl district chhunga khawsak harsate leh puih ngaite tana mitin luanchhuah theihna tur dawhthleng duanchhuah a ni a, a hmingah ‘Fairel Bel’ vuah a ni. Fairel belah hian chawhmeh, bungrua leh mitin mamawh tlem lua awm loin mitin a duh apiang tan eng tanpuina chhun theih zel a ni dawn a, a semchhuah leh dan tur ngaihtuah tur Committee din a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy