MNF party hruaitu thar thlan turah official candidate-a an telh tawh lo chu a lawm tih senior vice president ni lai Tawnluia chuan a sawi.
Thawhtannia MNF office, Mizo Hnam Run inkhawmah an party senior vice president chuan a duh dan takin official candidate-a an telh tawh lo chu a lawm tih a sawi a. Party hruaitu thlan turah an constitution ang chiahin an kal tih a sawi.
“MNF party chuan hruaitu term a tawp apiangin official nomination kan siam thin a. A duh tan floor atanga chuh theih a ni. Floor atanga chuhtu an awm loh chuan official candidate-te tlinga puan thin an ni a. Tun tumah pawh hian a duh apiangin floor atangin chuh theih a ni. Chuhtu an awm loh chuan RO-in candidate chhawp chhuahsate chu tlingah a puang mai dawn a ni,” a ti.
Tuna an official candidate-te chu Nomination Committee-in an vai aiawha an thlanchhuah a ni tih Tawnluia hian a sawi a. “Tun dinhmunah chuan Pu Zoramthanga uapna kan la mamawh. Ramri leh hnam issue-ah a hnathawh ang thawk an awm lo. Kum 15 chief minister lo ni tawh hi sulsutuah kan la mamawh a ni,” a ti.
MNF chu Mizo hnam party a nih angin, ruling-ah awm lo mah se, Mizo nationalism champion-pui turin an kal zel anga, an goal kan hlen chhuah hma chu an kal zel dawn tih a sawi bawk.
MNF adviser J Malsawmzuala Vanchhawng chuan MNF sawrkar laiin sawrkar laipuiin nawr mah se, ramri hungah hma a la duh loa, ZPM sawrkara chief minister chuan ramri hung chungchangah Delhi a zin hnuah a thu a thlak nia a lan thu a sawi. NGO-ten FMR duh lohna lantira an punkhawm hial tawh laia ZPM sawrkar chet dan chu a ngaihthat thlak loh tih a sawi a ni.
Min telh tawh lo hi ka lawm – Tawnluia
