Chawngte khuaa tlawmngai pawl hrang hrang chuan an harsatna ngaihthahah puhin minister pathum laka an lungawi loh thu an puang.
Joint NGO Chawngte chu Inrinni khan an thukhawm a. Kumin May 8 leh 9 a Home minister, PWD minister leh Health minister hnena Chawngte khawtlang harsatna leh mamawh an thlen, thla hnih liam hnu-ah pawh chhanna an la hmu lo chu hriatthiam har an tih thu an sawi.
May 8 khan Health minister hnenah Chawngte Community Health Centre-a doctor pakhat leh x-ray technician awm lo chungchang bakah hriselna kawnga an khawtlang hmasawnna tura thawktu dang indaihlohna an thlen a; an thlen hnu-ah Health department hnuaiah doctor 35 lak an nih tawh laiin Chawngte CHC-a doctor an dah ve lo chu hriatthiam har an tih thu an sawi.
May 9-a PWD minister hnena Chawngte khawchhung kawng siam mek an thlen chu an beisei angin tihhlawhtlin a la ni lo tih an sawi a. Home minister hnena Chawngte Police Station-a thawktu indaihloh dan an thlen tawh pawh thawktu dah belh chu sawi loh, constable awmchhun chu kumin June 25 khan sawrkarin a sawn chhuak a, khawtlang zahlohnaah an ngai tih an sawi a ni.
Minister 3 lakah Chawngte NGO lungawilo
