Minister Dr R Lalthangliana’n Mizoram mamawh centre-ah thlen

Minister Dr R Lalthangliana’n
Mizoram mamawh centre-ah thlen
Minister Dr R Lalthangliana chuan sawrkar laipuia ministry hrang hrang dawrin Mizoram mamawh a thlen.
Ministry of Micro, Small & Medium Enterprise secretary BB Swain a hmuhnaah MSME scheme hnuaia Mizoram district 4-a Flatted Factory Complex sakna (construction) atana senso zaa 90, cheng vaibelchhe 44.8877 sawrkar laipuiin a sanction tawh pechhuak thuai turin dilna a thehlut a. He Complex sakna atana state sawrkarin a tum tur, state matching share vaibelchhe 4.4901 chu state Finance deparment-in kumin March 9 khan administrative approval a pe chhuak tawh tih a hrilh a ni.
Mizoram Environment, Forest & Climate Change minister TJ Lalnuntluanga nen Union Minister for Environment, Forest & Climate Change Bhupender Yadav an hmuhnaah Mizoram tana environmental clearance pe theitu body – State Level Environmental Impact Assessment Authority (SEIAA), 2022 July 18-a tawp tawh chu a body thar din thuai turin an ngen a. SEIAA body awm loh avang hian kawngpui laih, mining/ stone quarry leh a dangte tan environmental clearance pekchhuah kawngah Mizoramin harsatna lian tak a tawh mek thu an thlen. Hei bakah hian Lengpui hmuna National Institute of Technology sak mek, forest clearance neih loh vanga tihtawp lailawk chungchanga harsatna an thlen bawk.
Director General of Forest (DGF) Chandra Prakash Goyal an hmuhnaah SEIAA siam thar chungchang leh Lengpuia NIT building sak mek atana forest clearance tulna an sawipui leh a ni.
Mizoram State Standing Counsel, advocate Sidesh Kotwal nen an inkawmnaah Dr R Lalthangliana hian National Green Tribunal Principal Bench New Delhi-in environmental clearance nei lo quarry khawih a phal loh avanga Mizorama construction agencies leh quarry neitute harsatna tawh chungchanga NGT-a appeal thehluh tur a sawipui a. Hemi kaihhnawih document pawimawh chu advocate hi pek niin, a rang thei ang bera NGT-a one-time relaxation dil chungchang an sawidun a ni.
Ministry of Ayush-a joint secretary leh mission director ni bawk Kavita Garg hmuin Mizoram mamawh chi hrang hrang a sawipui bakah Ayush minister Sarbananda Sonowal leh Ayush ministry secretary Vaidya Rajesh Kotecha te hnenah khum 50 leh khum 10 awm theihna tur Ayush Hospital engemawzat sakna atana sum sanction thuai tura dilna a thehlut a ni.
Health minister hian NITI Aayog member (i/c Health) Dr VK Paul hmu in a hmaa a lo thlen tawh Mizoram mamawh hrang hrang a sawipui a. Mizoram tana damdawi ina hman tur khawl pawimawh (MRI leh x-Ray) ngaihtuahpui rang turin a thlen.
AIIMS New Delhi-a Chief of Cardiothoracic Centre Prof. Balram Bhargava hnenah ZMC-a Cardiology Department din a nih theihna atana thil pawimawh a sawipui a. Fund awmtheite haichhuak tura ZMC-in DPR an buatsaih chu Prof. Balram Bhargava kaltlangin a thehlut. Minister thu thlente a tul anga a lo bawhzui thuai tur thu ICMR director general kalchhuak Prof. Balram Bhargava hian a lo hrilh a ni.
ZMC Administrative Block, cheng vaibelchhe 103 senga sak zawh tak hawng turin Union Health minister Dr Mansukh Mandaviya chu Mizoram minister hian a sawm bawk.