Minister hlui, ZPM Val Upa Council member ni lai KL Lianchia (91) chu January 14 zing dar 12.30 khan a thi.
KL Lianchia hi kum 1933 khan Biate-ah a piang a, kum 1955-ah Sangmawii nen inneiin fa mipa 2 leh hmeichhia 3 an nei. Thiamna lamah harsa tak chunga lehkha zir chhoa BA (Distinction) a passs a ni a, MA zir a tum laiin Mizoram buai avangin a chhunzawm thei ta lo.
Mizo Union din tirh atangin a zawm a. Party thalai hruaitu a ni a, party pui lamah pawh nihna pawimawh a chelh hman. Kum 1982-ah PC party a zawm a. General secretary, consultant, Parliamentary Board chairman leh vice president a chelh tawh.
Kum 1984 leh 1987-ah PC ticket-in Lungpho bial MLA atan thlantlin a ni a. Kum 1998-ah Khawhai bial atangin MPC ticket-in thlantlin leh a ni. Hemi tum hian MPC leh MNF sawrkar intawmah cabinet minister niin, Health & Family Welfare leh Sericulture a enkawl a. Health minister a nih laiin ‘State Illness Assistance Fund’ – BPL chhungkua damlote sawrkar damdawi in leh sawrkar recognised damdawi ina awmte, an damdawi man sawrkarin a tumsak vekna chu a introduce hman a ni.
Kum 2017 chhoa ZPM party a din theih nana theihtawp chhuahtute zing ami leh sulsutu a ni a. ‘Zoram Peoples Movement’ tih hming pawh hi a rawt chhuah niin, committee thukhawmin an pawmpui a ni. A hun tawp thlengin Val Upa Council member a ni.
Kum 2018 tawp lamah stroke a nei ve a, a lung a chak lo tih hmuhchhuah niin, pace maker a vuah a. 2023 October khan pneumonia vangin damdawi inah enkawl a ni a, a khum bet zui ta a ni.
Minister hlui leh ZPM VUC ami KL Lianchia thi
