Minister-ten sawrkar thawhpui
theih tur mi thlang turin chah
Sinlung Hills Council inthlan campaign minister-te chuan state sawrkar nena tha taka thawk ho thei tur mi thlangchhuak turin mipui an ngen.
ZPM party leh HPC tangdun chuan Sinlung Hills Council (SHC) inthlan campaign kharna hi Inrinni khan bial 12-ah an hmang a. Vervek biala hmapuitu minister Lalrinpuii chuan, Pathian remruat leh mipui khawngaihna avangin ZPM-in inthlanpuiah sawrkarna an siam a, kalphung thar thlen turin mipui hnenah an tlangau a, chu kalphung thar chu tunah hian bul an tan chho zel tih a sawi. “Kan ti ang kan tihte a tahtawlin kan ti chho mek zel. Development kal chak tur chuan plan siamthat a ngai a, plan awm hmasa lo chuan hna a thawh ngawt theih loh. Plan leh project tha tak nei tur chuan helai bial mipui leh sawrkar kan thawhho that a ngai zual hle. Chuvangin, kan party candidate-te min vote pui turin ka sawm che u a ni,” a ti.
Suangpuilawna hmanpuitu minister PC Vanlalruata chuan Hmar tlangdung mipuiin ‘Tualvungi ko thiam’ an mamawh tih a sawi a. Hmar tlangdung mipui taimakna leh handholding policy chu hmasawnna tura thil inkawp rem tak a ni, tiin, “ZPM chuan sem policy niloin thawhrimna kan tlangaupui a; hei bakah hian hmasawnna tur kawng hrang hrang chu sawrkar, Council leh VC inkawprem tak tha chakna hmanga hma lak kan duh a ni,” a ti.
Khawlian biala campaign kharnaa thu sawitu minister Lalnghinglova Hmar pawhin, Hmar tlangdunga hmasawnna a thlen zel theihna turin state sawrkarna chelhtu lam candidate vote turin mipui a sawm tih a sawi a. MLA fund leh sawrkar atanga sum awmte nen tangrualin sum awm ang ang tangkai zawka Sinlung Hills mipui tan hman theih a nih tur thu a sawi a ni.
Saipum biala hmanpuitu ZPM president Lalliansawta chuan, SHC inthlanah mipuiin hnehna an pe a nih chuan Hmar thimpui tia sawi thin tlangdungah hian hmasawnna kawl a eng ve tawh dawn tih a sawi. Sinlung Hills Council inthlanpui chu ZPM party chuan an ngai thutak hle a. HPC nen inremna thuthlung an ziah hnua campaign khuhhawn atangin Council huamchhunga bial hrang hrangah an fehchhuak nghal a, hmar tlangdunga sawrkar hmalakna tluang taka a kal theihna tur leh he tlangdung mipui tan ZPM sawrkar chu malsawmna thlentu a nih beiseiin theihtawp chhuahin hma an la tih a sawi.
“State kan nih hnu atanga vawiin thlengin sawrkar hmasaten he tlangdung hi an ngaihsak tawk lo niin a lang. Hmasawnna a kalmuang hle niin ka hria a, chuvang chuan hmar tlangdung mipuiin tun inthlanah hian rilru fim tak leh hmalam hun thlir chunga hruaitu tha, sawrkar lai nen lungrual taka thawk dun thei tur in thlan chhuah ka beisei a ni,” a ti.
Minister-ten sawrkar thawhpui theih tur mi thlang turin chah
