Walnut an ti a, keinin khawkherh kan ti ve thung, kâwr chang tha tak a nei a, German tlangval Andre Ortlof chuan minute khatah khawkherh pum 44 seh kehin Guinness World Record a siam.
Augsburg, Bavaria a cheng, Andre, kum 30, hian plate-ah khawkherh hi a inchhawp a, chu chu a theih anga rangin a seh keh ta hmiah hmiah mai a ni. Record siam tur hian khawkherh tihkeh nan thildang engmah hman theih a ni lo.
Andre Ortlof hi Guinness World Record-ah a mikhual tawh lo hle a, record 100 chuang a siam tawh a, chung zingah chuan minute thum chhunga pasta gram 950 ei zoin, 2021 khan minute thum chhunga pasta ei hnem thei ber record bakah, minute thum chhunga shrimp ei hnem ber (gram 428), chopstick hmanga second 30 chhunga jelly ei hnem ber (gram 400), mit tuam chunga minute khat chhunga jelly ei hnem ber record te pawh a tel.
Ortloaf hian 2013 atang khan record a siam tan a, a record siam hmasak ber chu inchawinaah tihpalh thil thua a siam niin, chuta tang chuan record siam hi hobby-ah a nei ta a ni ber a, Germany-a Guinness World Record siam hnem ber a nih bakah Guinness World Record 100 siam tling thei naupang ber record te pawh a siam tawh a ni.
Minute 1-a khawkherh 44 seh kehin record siam
