Daily Newspaper

Miocic lakah DC a tlawm nawn leh

29

Pathianni zing khan UFC ngainatute ngaihven hlawh em em UFC 252 chu Las Vegas khawpuiah neih zawh a ni ta a. Palian huanga fighter tha ber inchuhna ang hiala ngaih title fight-ah champion hlui Denial Cormier (DC) chuan champion lai Stipe Miocic a hneh lo nawn leh a, UFC chawlhsan zui tura ngaih a ni. Insual dangah tlawm nei lova kaltluang mek Sean O’Malley chu uiawm takin a tlawm ve bawk.

Fak hlawh Miocic
UFC palian huanga champion mek Stipe Miocic hi fighter fing, insiam reng chak, tuarchhel leh dawhthei tiin fak a hlawh hle thin a, palian huanga fighter ropui ber ang hiala ngaitu an awm teuh tawh. Pathianni zinga a hmachhawn DC chu ni dang zawng aiin a rawn hneh zui leh ngat a, UFC chanchina palian fighter tha leh ropui ber ang hiala ngaih ngheh a ni leh zual. A khingpui DC hi knockout em lo mahse a tir atanga a tawp thlengin a thunun tluan a, unanimous decision hmanga hnehna changin a kawnghren a humhim.

Weight then hran pahniha champion hlui, USA ah Wrestling champion hlui ni a, Olympic-ah USA aiawha fehchhuak a, team captain hiala an ruat tawh Deniel Ray Cormier hian inhnek a thiam tel em vangin UFC huangah pawh a hlawhtling a, a khingpuiten an hlau hle thin. UFC-ah hian mi pahnih chiah hneh loh a nei a, chung mite chu Jon Jones leh Stipe Micocic an ni a, an ni pahnih lakah hian vawihnih ve ve a tlawm.

Fighter tha tak, a khingpuiten an hlauh nghal ngawt thin hi Stipe Miocic hian a khelh dan a thiam a, ngam taka a beih bakah a chak lohna lai a hrechiang a, UFC 252-ah pawh hian chungnung zawkah a tang. An intawn hmasa pahnih ang lo takin round khatna atangin chetha zawkah a tang a, round khatna tir lamah DC hian bul tan tha mahse a zuih telh telh a, round hnihna tawp lamah phei chuan knockout hmangin a tlawm leh teuh hle a, dar riin a chhan hman hlauh thung. Round dangah pawh DC hian a tum angin a khel thei lova, a mi vei lam hliam vangin a khawhmuh a fiah lova, hei hian a chet tikhawr hle. Round tawp lamah rawn chetha deuh fu mahse hnehna chang tur khawpin a inlan zo lo va, endiktu pathumte chuan Miocic hi point an pe sang zawk vek a, 49-46, 49-46 leh 48-47 a hnehna changin a kawnghren a humhim leh ta a ni.

DC nen an intawn hmasak berah Miocic hi round khatna lekah knock-out in a tlawm a, a kawnghren a hloh. DC a hneh loh hnu hian vawi 10 dang intawng leh se vawi 10 a chak a inrin thu a sawi zui nghal. An intawn nawn leh tumin round lina tir lam thlengin che chhe zawkah a tang a, tlawm leh ngei tura ngaih a ni hman. Round lina laihawl atangin a chetha tan a, round lina a tawp meuh chuan knockout in a chak hman der. An inkara tha zawk tichiang a, inching fel law law turin Pathianni zing khan an intawng nawn leh a, Miocic hian nidang zawng aiin a hneh zui ta a, vawihnih a hneh zawn ta ni.

Palian huanga kawnghren humhim rei ber ni mek Stipe Miocic hmaa ding leh tur an inrinsiak nghal a, hnek na ber ang hiala ngaih thin Cemeroon fighter Francis Ngannou chu rinkai ber a ni mek. Miocic hian palian leh hnekna zet mai Francis Ngannou hi UFC 220-ah a lo hneh tawh a, an intawng nawn leh a nih pawhin chak tura rinkai a ni leh ngei ang. Hetihlai hian UFC fighter tha zet, a tal khawbaw ve theih em vang a nih tur ang ni phak lo thin Jon Jones chu palian huangah inlan a tum mek bawk. Vawihnih ngawt Deniel Cormier lo hneh tawhtu Jon Jones leh Stipe Miocic te hian kawnghren an inchuh thei a nih chuan boruak an nei lian hle ngei ang.

Damdawi In lakah DC
A elpui lian tak, palian huanga fighter tha ber nihna a chuhpui Miocic laka a tlawm hnuin Deniel Cormier hi damdawi In panpui nghal a ni a, a mit hliam enkawl zui nghal a ni. DC chuan a mit veilam hliam vangin ngai a awh lova, a chetthat loh phah thu a sawi a. “Ka khaw hmu a thim mup a, ka hmuh chian theih tawh tlat loh vangin tha taka inlan a har a, harsatna ka tawh phah ta a ni” a ti. DC hian Miocic mit a kawm hmasak zet a, round dangah Miocic hian kawmsak zui ve leh a, DC hi a buai phah ta zawk a ni. Miocic lakah a tlawm nawn leh tak vang leh kum 41 mi lai a nih tawh vangin Deniel Cormier hian UFC a chawlhsan ngei rina a lian zui hle.
O’Malley a tlawm

UFC 252-a fight ngaihven hlawh ber dawttu-ah bantamweight-ah tlawm nei lova kaltluang mek Sean O’Malley chuan fighter tha tak Marlon Vera a hmachhawn a, first round-ah a inhliam vangin uiawm takin a tlawm a, a record tha tak tihtawpin a awm.
Fighter tha, mi 13 hmachhawn tawha la hneh vek Sean O’Malley hian a khingpui bawh a tumna lamah a ke a bilh sual. A ke a bilh hnu hian ngai a awh lo hle a, a chetha hleithei meuh tawh lo. A ke vang hian tlu a, Vera hian bawhzuiin referee Herb Dean chuan fight a tizawp zui a, O’Malley chu uiawm takin a tlawm ta a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy