Mipa rinawm loh hriat theih dan
Issue hmasa lamah hmeichhe rinawm lo hriat theih dan tih kan rawn tarlang tawh a, tun tum chu mipa lam a ni ve thung. Relationship lama mithiam ten mipa rinawm lo chi leh rinawm lo tur chu a hriat lawk theih a, rinawm lo te pawh manchhuah theih dan kawng a awm niin an sawi. Hmeichhe rinawm lo tur hriat theih dan nen pawh a point thenkhat chu a inang viau e.
In intawng a, a awm duhawm thiam hle a, nang pawhin i duh ve ta mai reng a. Mipa ten hmeichhe han lëm vel hi an thiam ve riau a, an duh zawng te bula awm dan te pawh an thiam ve khawp mai. Mahse, chu mipa chu i lakah a rinawm dawn em? Chu chu hriat lawk theih ni se nakina i rilru natna tur i pumpelh thei dawn tihna a ni. Relationship lama mithiam te inlaichinnaa rinawm lo te hriat theih dan ni a an sawi te kan rawn tarlang e.
1. Mipa, nute te hlau leh nu te bula pangchang thin te hi hmeichhe tan an ninawm thei, mahse, chutiang mi chu an ngaihzawng te lakah an rinawm duh niin an sawi tlat. Mipa a nu nena inzawmna nei nghet lo te chu inlaichinna chungchangah an rinawm lo awlsam zawk niin an sawi. Mahni nu te fel lohna leh tlin lohna sawi zuah zuah ching te chuan nang pawh a kalsan leh thuai ang che, a nih loh vêk pawhin midang nena kawp che a awlsam ang. Mipa, a nu zah lo a, hrâwk ching chuan nang pawh a zah dawn lo che a, a nu chunga a tih ang bawk chu i laka a awm duh dan tur pawh a ni.
2. Han chhai vel che a thiam riau a, reiloteah a chhai thlu ta mai reng che a, mahse, a rilru tak tak i hre thei lo. Taksa in khawih leh in chhai vel chu a thiam hle a, mahse, titi pui leh thusawi pui tak tak dawn chuan thingtum ang mai a ni leh lawi si. Chutiang mipa chu a rang a rangin tlansan rawh. Ngaihzawng pakhatah an lungawi lo va, a ngai an ning thuai thin. Rinawm lo tur chi a ni.
3. Hriatchian a har em? Khatia hriatchian a harna tak kha a tirah hìptu che pawh a ni mai thei, mahse, thuruk a ngah riau a, a fimkhur riau reng a, a phone i khawih hlek pawhin a awm a nuam lo emaw ti turin a awm a, a phone a ui riau a, SMS leh WhatsApp velah hmeichhe contact message folder ruak si a awm nual chuan fimkhur hle ang che. Rinawm lo te chu an fimkhur thin a, engkimah an ‘secretive’ riau zel a nia. Khawiah a kal a, eng nge a tih te a hrilh tha duh lo fo ang che, mahse, nang khawiah nge i awm a, eng nge i tih tih te chu hriat a duh leh riau si ang. I thusawi a ngaithla peih hle a, mahse, eng vakmah a sawi ve ngai lo. Chutiang mipa chu an rinawm lo duh tih hre reng ang che.
4. Eng emaw ti turin in in-date a, mahse, in intiam hunah a rawn lang lo emaw, last minute-ah chawpchilh takin a rawn cancel te a nih chuan ‘cheater’ a ni tih hre mai rawh. Nang aia chhuahpui tur duhzawk a nei tih hrethiam ve mai ang che. In intiam lawk tawh a, a hman dawn lo a nih chuan a hmalamin a rawn hriattir tur che a ni a, tin in intiamna ang chu tihhlawhtlin ngei a tum bawk tur a ni. Mahse, chhan mumal lo tak emaw, a chhan pawm awm lo tak emaw avanga chawpchilh taka a rawn cancel emaw, engmah sawi lo va a rawn inlan lo a, a hnuah “Ka hre hreng a, mahse, ka buai lutuk a, phone pawh ka khawih hman lo a, kan rawn hrilh thei thlawt lo,” a ti emaw, “Rawn call che ka tum a, a call tlang theih miah loh,” a ti emaw a nih chuan awih duh suh. “Bye bye,” ti la, hawisan hmak la, i tifuh zawk ang.
5. I lakah thuneih nuam a ti ang a, khawiah nge i kal a, eng nge i tih tih te hriat a duh ang a, mahse, ani chuan engmah a hrilh ve leh chuang si lo ang che. A ngaihtuah che emaw tiin i lawm viau a ni mai thei, mahse, a len vahna lamah in intawn loh nana a lo ti te pawh a ni lek mai thei. A thil tih leh awmna te a hrilh ve chuang si loh che a, nangmah pawh control che a tum tlat si a nih chuan a rinawm lo tihna a ni. I thian thenkhat thlah tura a tih che pawhin ngaih ti tha lo viau ang che.
6. In inngaihzawn thu chu zêp tlat a duh a, a thiante pawh i hre ve lo a, tu te nge a kawm a, eng gne a tih thin pawh i hre vak lo, mahse, ani chuan i thiante zawng zawng a hre vek thung si. I thiante kha hriat a duh pawh a ni thei, a ngaihzawng dang nen man chhuaktu-ah an tan loh nan! A facebook status-ah ‘single’ a intih reng a, facebook leh social media dangah hmeichhiain an chhaih a, an nêl over riau a nih chuan a rinawm lo tih hre mai ang che.
Mipa rinawm loh hriat theih dan
![](https://theaizawlpost.org/wp-content/uploads/tap_logo-min-large.jpg)