Mipui beiseina pe thei Congress chauh
– Dr Lallianchhunga
ZPM sawrkarah mipui an beidawng tan a, MNF chu an hruaituteah an party mite an beidawng tan si a, mipui hnena beiseina pe theitu chu Congress party chauh an ni tih Congress hruaitu Dr Lallianchhunga chuan a sawi.
Saitual leh a chhehvel khaw hrang hrang a tlawhnaa an party mite nen an inkawmnaah MPCC thupuangtu Dr Lallianchhunga chuan, beiseina sang tak nena mipuiin an thlantlin ZPM sawrkar chu kum khat a liam meuh chuan an sawisel nasat em em sawrkar kal tawhte an tluk lo hle tih a lang mek a. Assembly Session-ah ZPM minister-te an che nawi em em a, sawrkar kalphung zirchianna tak tak an neih loh zia a chiang a. ZPM MLA thenkhat chuan ram hnuk khawih thil an buaipui rei tak tak peih lo tih a hriat hle tih a sawi.
MNF-ah lah Pu Zoramthanga a insawhnghet tulh tulh a, MNF pachal an bei a dawng tan nia sawiin, Congress party lo chu mipui hnena beiseina pe thei party dang an awm loa, Zoram mipui an beidawn zel lohna turin Congress party a sawrkar a ngai tih a sawi.
ZPM sawrkarin Universal Healthcare Scheme a tih thar chu a thu chuan that hmel tak ni mah se, a tak takah chuan sawrkar hnathawk awm ve lohna chhungkaw tam zawk tan tel ve ngaihna a awm lo tih Congress thupuangtu hian a sawi.
An intiam anga sawhthing an leisak theih loh avangin khawtualah sum lengvak a tlem a. YMA Chhiatni Fund khawn hun chhung pawh khaw thenkhatah chuan an pawhsei phah hial nia sawiin, “Congress sawrkar laiin mipui ban phak Healthcare Scheme kan siam a, inziaklut pawh chhungkaw nuai hnih chuang an tling. MNF sawrkarin a rawn tichhe hman hle a, an tlak dawn kum, 2023 phei chuan Mizoram Healthcare Scheme hnuaia inziaklut duh chu chhungkaw sing li pawh an tling tawh lo. ZPM hian healthcare scheme kalphung dang a rawn duang a, sawrkar hnathawkten an duh loa, private hospital lianten an pawm thei loa, sawrkar hnathawk awm lohna chhungkaw tam tak tan inziahluhna fee a sang lutuk a, an chhawr ve pha dawn lo. Congress party a sawrkar hunah mipui chhawr theih tur Healthcare Scheme tha tak kan duang leh ang,” a ti.
Mipui beiseina pe thei Congress chauh – Dr Lallianchhunga
