Daily Newspaper

Mipui court-ah zawk

11

Tun hnaia anti defection act behchhana MLA a nihna atanga bantir Serchhip bialtu Pu Lalduhoma chungchangah, law court-a kal nge mipui court-a kal tur tih zawhna awm mek chungchangah, ZPM Political Affairs Committee chuan nimin khan ‘court lama kal lovin mipui court-ah an kal zawk dawn’ tih an puang fel ta a. By-election neih hunah Pu Lalduhoma a ding leh ang tiin, ‘dikna zahawmzia puanchhuahna’ remchang a ni tih hriaa Pu Lalduhoma vote theuh turin Serchhip bial mipuite kan sawm nghal a ni, an ti a.

Pu Lalduhoma, MLA nihna hlihsak a nih chungchangah ZPM chuan, he thubuai hi dan bawhchhiatna avanga inhremna ni lovin, politics-a inbeihna liau liau a ni, an ti bawk.

Hetianga thu chiang a awm takah chuan, Pu Lalduhoma chungchangah hian court ruling hriat tur a awm dawn ta lo tihna a ni a. Bye election-ah hian Pu Lalduhoma hi a tling emaw, a tling lo emaw, a chunga thuneihna lek a nih dan hi chu inhnialna tawp thei lovah a chang tawh mai dawn tihna niawm tak a ni.

Bye election neih a tul hian, sawrkarna fawng chelh mektute dinhmun azirin chak tur leh chak lo tur hi a hriatlawk deuh ruak thin. Assembly house-a seat dinhmun hi, pahnih khat leka inthlau a nih chuan, bye election leh a sawhkhawkin sawrkarna her danglam dawrh thei a nih thin avangin inhruipawhna a nasa thei hle. Tun dinhmunah chuan, bye election-a chak leh chak loh hian sawrkarna fawng chelh mektu dinhmun hi a tiderthawng pha dawn lo niin a lang a. Tunhmaa tawnhriat lo awm tawh atanga thlir chuan, Serchhip mipui hian bialtu atana an duh em em thin kha, ruling lam mi leh sa a ni lo tih an hriatchiansa tawh avangin, ruling lam biala awm thlahlelin an sukthlek hi an thlak thei a. Chutih laiin, Pu Lalduhoma hian a hmaa thlang tlingtute vote bakah amah lainattu vote hi hmuh belhin a hma aia nasain a tling thei bawk.

Eng pawh ni se, Assembly Speaker thutlukna a dik leh dik loh hriatna tur court ruling hmuh tur a awm dawn tak loh avangin, tuna mipuiin kan tih theih awm chhun ni ta chu, mipui court-ah Pu Lalduhoma hi a chak dawn em tih lo thlir ngawt mai hi ni ta berin a lang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy