HIVtAIDS natna leh a darh dan zirchiangtute chuan Mizorama mipui nawlpuiah HIV a darh nasa tawh a, hmuhchhuah loh tam tak an la awm avangin zaa 95 tal hmuhchhuah tuma tan lak a tul hle tih an sawi.
Aizawl district-a HIVtAIDS dona kawnga chak zawka hmalak dan turah Thawhlehni khan inrawnkhawm a ni a. Kaihruaitu additional DC Zoramsiama Hmar chuan, thalai leh kum naupang zawk zingah nasa zawka awareness kalpui a pawimawh a, HIV kaiten enkawlna tha taka an dawn theihnan HIV kaite thinhrik leh diriamna kan paihbo a hun tawh tih a sawi.
National AIDS Control Organization (NACO) national consultant itc Statistics Pradeep Kumar chuan, HIV chungchanga Mizoram dinhmun zirchianna atanga a landanin Mizoram chu India ram pum HIV dinhmun aiin a let 15-in a sang zawk a, kum 2025- 2026 chhunga Mizorama HIV kai hmuhchhuah zingah Aizawl district ami an tam ber a, Aizawl district chu a bupui ber a nih avangin nasa taka tan lak a ngai tih a sawi.
Inrawnkhawmnaah hian HIV hian thliar bik neiloin mipui nawlpui (general public) ah a lut tawh a, mipui mimirah nasa takin a darh kual tawh tih sawi a ni. HIV kai hmuhchhuah zinga zaa 76.3 chu inpawlna atanga kai an ni a, HIV bakah hetiang atanga kai theih natna Dadu (Syphilis) vei pawh an tam tih sawi a ni
Mizoramah HIV an kai tih inhre lo leh hmuhchhuah loh tam tak an la awm tih sawi a ni a. HIV kai zawng zawng zinga za 95 talin an dinhmun an hriat a, enkawlna an dawn theihnan nasa taka hma lak a tul a, HIV kai hmuhchhuah tlai lutuk avanga thil tha lo zawk thleng thin pumpelhna atan nasa taka HIV kai leh kai loh endik a tul tih sawi a ni.
MSACS project director Dr Jane Ralte pawhin, MSACS-a thawktute bakah kohhran leh khawtlangin theihtawp chhuaha HIV do kawnga hma an lakna chuan rah tha a chhuah mek tih sawiin, Mizoram-a HIV kai thar hmuhchhuah chu kumtin a tlem ve hret hret a, chutihrualin, HIV do kawngah tha thlah theih a ni loa, HIV kai thar awm lo tura nasa zawka kan beih zel a tul tih a sawi.
Mipui nawlpuiah HIV darh nasa tawh
