Kolasib district bawrhsap Robert C Lalhmangaiha hoin National Highway chungchangah Nilaini khan Kolasib-ah thutkhawm a ni a. Tunhnaia kawng chhe lutuk leh chak zawka thawmthat dan tur ngaihtuah ho niin, mipui tan kawng tha pe turin kawng siamtute hi bawrhsap chuan a chah.
National Highway 306 chu Mizoram chak lakna ber leh kawng pawimawh ber pawl a ni a; Kolasib bialtu MLA, deputy speaker hoin tunhnaiah pawh an en ho tawh a; hmasawnna liantham erawh hmuh tur a awm lo chu an ngaihtuahna seng turin bawrhsap hian a sawm a. District level-ah a tul ang ang ngaihtuaha hma lak dan tur buaipui ho a ngai tih a sawi.
NHIDCL hotute leh contractor-te chu an harsatna zawtin, an kalpui tum dan ngaihthlak a ni a. Contractor-te sawi danin, sum an hmuh veleh theihtawpin hma an la ve a. A tul anga culvert siam niin, hmun thenkhata paver block an siam chu khawtlang ngenna angin concrete pavement-a thlak a ni. Amaherawhchu a curing period – ni 28 chhung nghah a ngaih vangin duhthusama hma lak theih a ni lo.
kawngpui sira phalna la hmasa loa approach road an lo siam thin chuan kawngpuiah tui a ti tling a, chu chuan kawng a tichhe hma thin tih NHIDCL hian an sawi a. Quarry bula stone dust, kawngsira vantlang mipuiin an hmanrua an dah thin leh an kawtkaia side drain siam an duh lo thin chuan an hnathawh a tih harsat phah niin an sawi bawk.
An harsatna hriatthiamawm tam tak awm mah se, mipui mamawh em em thil pawimawh hmasa, a khuar zual lai hnawh leh tawhsual tawh theihna tur thawmthat zung zung a tul tih bawrsap hian a sawi a. VC-te nen thawhhona tha nei a, an hun tiam chhunga zo fel tura tan an lak a ngai tih a sawi. Tun atang chuan khauh zawka district administration-in an nawr tur thu leh tanpui an ngaih pawhin an tanpui tur thu hrilhin, “A tuartu ber chu mipui an ni a, mipui tan kawng him leh hmantlak siam chu tihmakmawh a ni,” a ti.
Thutkhawmah hian district administration hotute, NHIDCL hotute leh contractor-te, senior EE PWD Kolasib, DFO Kolasib, Sub Hqs YMA, Joint VC – Kolasib, Kawnpui, Vairengte, Bilkhawthlir hruaitute bakah VCP – Bualpui, North Chhimluang, Thingdawl, Khamrang, Mualkhang ho leh Land Owners Association an tel a ni.
Mipui tan kawng tha pe turin DC-in kawng siamtute a chah
