Site icon The Aizawl Post

Mipui theh tur bel a tlem – PC president

Mizoram budget pharh takah mipui chanai a tlem hle laiin, fatu hlui a buk tha hle tih PC president Vanlalruata chuan a sawi.
Thawhlehni-a PC party hruaitute inhmukhawmah Vanlalruata chuan, state budget chu Krismas ruai nena tehkhin theih a nih thu sawiin, tun budget chu ruai theh dawna fatu chan leh mipui chan angin then ni ta se, Kohhran Upa-te kohhran mipuiin kan sel nasat hle a ring tih a sawi.
“Krismas ruai kan theh dawn chuan ruai theh nana kan mamawh chhutchhuakin, chuta senso tur chu mi hrang hrangin kan thawhkhawm tura ruahman thin a ni a, kan thawhkhawmin a daih lohna chu Kohhran Committee-in a phuhruk dan an zawng leh mai thin. Kan state budget chu sa bel 100 chhum tur anga ruahman a ni ta a; he bel 100 tur zinga bel 81 deuhthaw (80.84%) hi mipui thawh tur leh mipui tana central atanga sum lokal tur hmanga lei tur a ni a; a bak bel 19 leh tlem (19.16%) chu a puka puk tur a ni. Kan ruai theh tur sa bel 78 deuhthaw (77.89%) hi hlawh leh inrelbawlna atana hman tur niin, fatu hluiah a kal a. Bel khat pawh tling lo (0.01%) chu rulh leh tura midang puktir tur niin, hei hi MLA-te puk tur a nih avangin fatu hluiah bawk a kal dawn,” a ti.
Fatu hluiah bel 78 deuhthaw (77.90%) dah a ni, tiin, “Sa bel 100 ngawt awmna ruai chu kan tlai dawn mange, tia phur taka ruai theh tum mipui tan bel 22 leh tlem (22.09%) chauh an zuah ta a ni,” PC president hian a ti.

Exit mobile version