Daily Newspaper

Mipuia innghat loin mipui dawmkanna duang zawk turin kan ngen – CLP

16

Covid-19 dona kawngah mipuia innghat loa mipui dawmkanna liantham tak duangchhuak zawk turin Mizoram sawrkar an ngen tih Congress Legislature Party chuan an sawi.

Congress Legislature Party thuchhuak chuan, Covid-19 in Mizoram a nuai na ta hle a, damdawia inenkawlna, staff lakbelh leh laboratory tihchakna lama hmalakna a chak tawk bawk si loh avang leh, Mizoram sawrkarin kawng dang zawh tur a hriat loh miau avangin total lockdown puan a ni leh mai thin tih a sawi.

Rei rak chhung total lockdown puan a nih tawh avangin thla tam tak hna thawh theih a nih loh hnu ah, chhungkaw tam tak sum lakluhin a chhiat phah thu leh, thla engemawzat sum lakluh nei mumal tawh lo, in leh dawr luah man pe thei lo, ei tur leina tur pawh nei tawh lo, sumdawnna tlachhe ta, bank loan rul thei lo, mangang em ema khawsa sang tam tak an awm mek tih a sawi a ni.

‘Hetiang hi kan dinhmun a nih laiin, MNF sawrkar hian total lockdown vanga harsatna tawkte tanpuina lam a la hawi duh chuang lo a. Harsatna tawkte tanpuina tur, relief measure pakhatmah a ruahman loa, mipuiin sawrkara chhiah leh bill kan pek turah ngaihnatthiamna engmah a siam duh hek lo,’ CLP thuchhuak chuan a ti.

2021 June 24-a CLP member, Pu Lalrindika Ralte, MLA-in Covid-19 vanga kan buai chhung chu electric bill leh tui bill mipui awltir rih tura chief minister hnena ngenna a thlente chuan sawrkar ngaihven a hlawh loh bakah hemi ni veka Central YMA kaihhruai NGO & all party meeting-in tui bill leh electric bill-ah mirethei zawkte hriatthiamna neih ni rawh se, an tihte pawh sawrkarin ngaipawimawh duh loin, in luah mante in hrethiam rih turin mipuiah ngenna a siam zawk hlauh tih sawiin, harsatna tawk mipuite chhawmdawl nana sawrkar sum hman tumna reng a awm lo, tih a sawi.

Sawrkar chu mipui tana ding, sawrkar hotute pawh mipui tana thawk tura thlantlin an nih laiin, MNF sawrkar chu MNF party tan chauha ding ang maia khawsa lui tlatah puhin, ‘Mizoram mipuiin ei leh bara harsatna nasa tak kan tawh mekah pawh hian hmalak tumna a nei miah lo a. Hei hi Congress Legislature Party chuan hriatthiam harsa a ti hle,’ a ti.

Mizoram sawrkarin Covid-19 leng karah pawh sawrkar laipui atanga pawisa hmuh tura an beiseite an hmu tha tawk tih Finance commissioner Vanlalchhuanga’n a lo sawi tawh thu te, ruahman lawk ni loa sum hmanna tam tak awm ve bawk mah se, sum hmanna tura ruahman lawk tam tak (travel expense, office expenditure adt) ah office kal mumal theih a nih loh avangin sum hman a ngai lo nia a lan tho thu te, hetiang a nih avang hian Mizoram sawrkar chu sum leh paiah talbuai lutuk tura an ngaih loh thu te a sawi bawk.

‘Chuvangin, total lockdown avanga eizawnna kawnga talbuaite, dinhmun harsa taka khawsa mek Mizoram mipuite dawmkanna tur – Relief Programme liantham tak duangchhuak thuai turin CLP chuan MNF sawrkar kan ngen a. Mipui thawhkhawm CM Relief Fund hmang chauha tanpui ngaite tanpui hi sawrkarin a tum tur a ni lo a, sawrkar buhzem ngei hi mipui tan a hawng tur a ni tih hi kan ngaihdan a ni. Chutianga ruahmanna siam kawngah chuan theihtawp chhuaha sawrkar pui turin kan inring reng a ni,’ an thuchhuah chuan a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy