Rorel lai ZPM chu mipuiin an duhkhawp loa, Congress party an enthla mek a, an insiamthat zel chuan mal sawm turin Pathian a inring reng tih Congress president Lal Thanzara chuan a sawi.
Zirtawpnia Congress Bhavan-a political session-ah Lal Thanzara chuan Lok Sabha inthlanah MNF an tlin chuan ZPM rilru a na hle dawn a, ZPM an tlin chuan Parliament-ah NDA lamah an thu ngei dawnin a lang a, Mizo mipui tan a hrilhhai thlak hle dawn tih a sawi.
Congress party pawh an beisei aiin mipuiin an thlir nasa a, an tling a nih chuan an inlungrualna vang a ni anga, an tling zo lo a nih pawhin MLA inthlan aiin hma an sawn ngei turah an ngai tih a sawi bawk.
Thla 4 chhungin ZPM sawrkarin mipui beisei a phak loh hle avangin Zoram mipui tam takin Congress-ah rinna an nghat leh tan mek niin MPCC president hian a sawi. “Rorel lai ZPM hi mipuiin an duhkhawp lo hle a, Congress party an enthla mek. Kan insiamthat zel a hun a, kan thawhhona a that poh leh Pathianin mal min sawm turin a inring reng,” a ti.
Kum 60 chhungin engmah an thawk lo anga Modi-a’n Congress a puh ang chiahin ZPM hotupa chuan kum 40 chhungin MNF leh Congress sawrkar inchhawkin engmah thawk lo angin a puh a, ZPM hotupa mizia leh BJP hotupa mizia chu a inang hle tih a sawi.
ZPM zawhah MNF sawrkar leh ring an awm mang lo niin Lal Thanzara hian a sawi a. “Kan sawrkar hrawn mek hian sum ngah inti hle siin hmunphiah a lei thei loa, thingtlang lamah sawhthing an ching nasa hle a, sawhthing hi hmunphiah anga an lei loh an hlauh thu sawi an tam hle. Kuthnathawktute an beidawng ang tih a hlauhawm. Congress chuan kan intiamna kan ti hlawhtling thin,” a ti.
Congress MP candidate Lalbiakzama chuan BJP-in seat 400 chuang la tura an inbeisei kha an sawi ngam tawh loa, Congress leh a thurualpuite an hlau em em ringawt niin a sawi. Congress chu an dinnaah an nghet a, an tumah an chiang a, Zoram mipuiin Congress-ah rinna an nghat leh ta hle tih chu candidate a nih atanga a zirchhuah tih a sawi a ni.
Mipuiin ZPM an duhkhawp lo Congress min enthla leh mek – Lal Thanzara
