Daily Newspaper

Mipuiten ramri lam tlawh tam rih lo turin ka ngen – Kolasib DC

18

Mizoram police-ten ramri venhim hna tha zawka an kalpui theih nan ramri lam hi mipuiten tlawh tam rih lo turin a ngen tih Kolasib district bawrhsap Dr H. Lalthlangliana chuan a sawi.

Kolasib bawrhsap hian July 26-a Vairengte Mizoram Police post-a Assam Police leh Mizoram Police-te innawrna chungchang leh ramria venhimna kalpui chhunzawm danah Ningani khan Kolasib-a thuthar thehdarhtute a kawm a. Vairengtea silai hmehpuah chungchangah Assam police-ten tih loh theih loh dinhmuna an nawrna vang a nih thu leh he thil thleng avanga nunna chan leh hliam an awm chu pawi a tih thu a sawi. “Chan tha zawk chang kan nih pawhin, nunna hial channa thil thleng chu chapopui loa, mitthi chhungte ngaihtuah tel chunga kan chetzia leh tawngkaah inngaihtlawmna leh lainatna tihlan a pawimawh,” a ti.

Ramria buaina thleng a nih avangin tun hun hi inpuahchahna tha zawka kalpui hunlai a ni, tiin Dr H. Lalthlangliana chuan, Ningani tuk khan ramri hrula Mizoram police duty-te tlawhchhuakin endikna leh inthlahdah lo tura infuihtharna a neihpui thu a sawi. “Tawlhlet kan tum loa, kan police-te huaisen zia hi rampum hriatah pholan mek niin, hmingthatna pawh kan chang mek a. Hmingchhe thiang kan ni tawh loa, tuna kan hmingthatna venghim tur hian theihtawpa tan kan lak a ngai a ni,” a ti.

Ramri veng tura police duty-te dinhmun tiderthawng thei zawnga thlalak leh video thehdarh awm lo turin mitin inchah a pawimawh tih a sawi a. Hengte avang hian ruahmanna a hlawhchham phah thei tih a sawi. Inkahna thleng avanga Assam ramri hrula khua awmten lirthei dangin, rel kawng thlenga dan tumin hma an la nia hriat a nih thu sawiin, “Heng buainate hi chinfel tum mek a nih rualin, nitin mamawh lakkhawm kawngah midangte ngaihtuah tel chunga khawsak thiam a tul a. Ramri venhim hna tha zawka kalpui a nih theih nan mipuite tlawh tam rih lo turin ka ngen a ni,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy