Daily Newspaper

MISA-in Annual Conference hmang

20

Thawhtanni chawhma dar 11:00 khan I&PR Auditorium-ah Mizoram Information Service Association (MISA) chuan MISA Conference, 2021 an hmang a. Infornation & Public Relations Minister Pu Lalruatkima chu Khuallian a ni.

Khuallian Pu Lalruatkima, Minister, Information and Public Relations Department chuan DIPR chu Department thenkhat anga thawktu tam leh lian ni lo mah se Department pawimawh lehzualna chu hrileng dona kawnga an tangkainaah hian a lang chiang em em a ni, a ti a. Mipui rin ngam leh rintlak ni tura I&PR Department hmalakna chu fakawm a tih thu a sawi a, hrileng dona kawnga hmatawngtu pawimawh berte zing ami an nih thu sawiin, sawrkar thuchhuak rintlak mipui hriata puanchhuahna kawnga mawhphurtu pawimawh tak an nih bak-ah DIPR chu Sawrkar ruahmanna leh hmachhawp thar mipuite hnena zirtir hmasatu an nih avangin mipui rilru sukthlek dan thui tak an hnathawh chuan a hril thin thu a sawi a. Hemi kawngah hian khawvel changkannain a ken tel hmanrua leh software hman chungchangah pawh intuaihriam a, midangte zirtirtu nih zel a pawimawh thu a sawi a ni. Sawrkar thupuangtu, Sawrkar policy puangzar bakah, thu thar lak khawm chungchang-ah te mawh la tu ber Department a ni a, Sawrkar chet velna zawng zawng hi kan hriat loh a thiang lo a ni, tiin a sawi a. Mizoram media kalphung that leh that loh thleng hian mawhphurna sang tak Department hian a nei a. Heng bakah hian Department hian Public Relations hna hi a thawk a ni tih hria ila, ramin harsatna leh dinhmun khirh tak tak a tawhin hengte hi a pawimawh zia sawrkarin a hre thin a ni, tiin a sawi. Sawrkar pawh hian kan hnathawh a pawimawhzia leh kan in pek zia a hria a, I&PR Department tih changtlun a tum mek laiin, Covid-19 hri-leng avangin Sawrkarin duhthusam a hmalakna atan sum leh paiah harsatna a tawk chho ta zel mai si a, kan hun tawn hian Department anga hmachhawp tam tak pawh a ti thuanawp nasa em em a ni, tiin a sawi a.

Minister chuan hnathawhna-ah inpekna, taimakna leh tumruhna nei ila, Innovative mind (thil thar hmuchhuah leh duan chhuahna rilru) thawktuten kan neih pawh a tul hle a, sawrkar hmel lanna pawimawh tak kan ni tih intheihnghilh lovin, Pathianin he hna thawk tur hian min dah a, kan hna te ama hnena kawltir chungin theihtawp chhuah thar leh theuh turin Mizoram Information Service Association member te a sawm bakah hmalam hun atan duhsakna a hlan nghal bawk a ni.

MIS Cadre Post hi 48 ah Post 19 hnawhkhah a ni a, member 19 awm mekin MISA Member tlem lai ber a ni a, tun dinhmun-ah hian post filled hi 39.5% a ni a, fill up loh hi 60.5% lai a ni.

MISA Annual Conference hi MISA Vice President Pu F. Lalfakzuala chuan a kaihruai a. MISA Patron Pi Lallianpuii hnen atangin thusawi ngaihthlak a ni a. MISA General Secretary Pu Malsawmsanga atangin report ngaihthlak a ni a. MISA Secretary Pu Andrew Lalremruata chuan lawmthu sawiin hun a khar a, Programme hi MISA Conference 2021 Business Session-in a zui nghal a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy