Miss Teen USA 2023 UmaSofia Srivastava, kum 17, chuan a ‘Miss’ nihna hlipin, a title a kalsan thu a puan hnuah Miss Teen USA 2023 runner-up Stephanie Skinner chu he title hi hlan tum a ni a, mahse, Stephanie Skinner chuan he title hi a hnar ve leh ta a ni.
Stephanie, kum 19, chuan, “Miss Teen USA nih ngei tumin theihtawp ka chhuah a, thil tam tak ka kalsan a, he title hi ka suangtuah thin kha ni mah se ka nungchang hloh phah chu ka duh lo tawp,” tiin title a hnawlna chhan a sawi a, thutlukna siam harsa tak a nih thu sawiin, a thutlukna erawh dika a hriat thu a sawi bawk.
Hmanni lawk khan Miss USA 2023 winner Noelia Voigt pawhin a title hlipin ‘Miss USA’ nihna a lo kalsan tawh a, chumi hnu kar khat vel lekah UmaSofia hian Miss Teen USA title a kalsan thu hi a puang ve leh ta a ni.
UmaSofia chuan, “He organisation kal dan hi ka mimal ngaihdan leh ngaihhlut zawng nen a inmil thei ta lo a, chuvangin bansan mai turin thutlukna ka siam ta a ni,” a ti.
UmaSofia chuan a title chu kalsan mah se Miss a nih chhunga a thil tawnah lawmthu sawiin, “Hetiang experience ka nei thei hi ka vannei a, mahse, zirlai pakhat chauh pawh ni se ka hringnun tiropuitu a ni tih ka hria,” a ti bawk.
Miss USA 2023 Noelia chuan ‘Miss’ title a kalsanna chhan chu rilru lam hrisel (mental health) lama inenkawl a, insawrbing lehzual a duh vang niin a sawi a, “Hei hian mi tam tak a barakhaih ang tih chu ka hria. Mahse, taksa leh rilru lam hriselna inenkawl that hi thlahthlam tur a ni lo. Hriselna hi kan hausakna a ni. Min lo support tawhna zawng zawngah lawmthu ka sawi. Tunah chuan zirlai bung thar kai a ngai ta a ni,” a ti.
Miss Teen USA runner-up-in ‘Miss’ title a hnawl
