Miss Universe 2024 – Victoria Kjaer Theilvig

Miss Universe 2024 – Victoria Kjaer Theilvig
Denmark nula hmeltha leh nalh Victoria Kjaer Theilvig, kum 21, chu nimin tuka Miss Universe 2024 grand finale-a Miss Universe 2023 Sheynnis Palacios chuan ‘Miss’ crown a khum tir ta. 73rd Miss Universe hi Arena CDMX, Mexico City-ah neih a ni a, ram hrang hrang 125 atangin contestant an tel. Victoria Kjaer hian record siamin, Denmark atanga he beauty pageant winner ni thei hmasa ber a ni.
Nigeria nula Chidimma Adetshina chu Panihna niin, Mexico nula Maria Fernanda Beltran chu Pathumna niin, Opal Suchata Chuangsri, Thailand leh Ileana Marquez, Venezuela te Top 5-ah an lang bawk.
India atanga tel Rhea Singha, kum 19, chu top 12-ah a lang pha lo a, preliminary round-ah a chetha thawkhat a, Top 30-ah a lang a, final round a inhlangkai zo ta lo. Top 12 chin hian evening gown round an nei a, top 12 contestant zinga pasarih chu Latin America atanga tel vek an ni.
Kumin Miss Universe thlanna hi Miss Universe lo ni tawh Olivia Culpo leh TV presenter Mario Lopez ten an host dun a, judging panel-ah mi 12 awmin, an zinga pahnih chu Asian niin, Latin American paruk, Europen pahnih leh America leh Africa atangin pakhat ve ve an tel bawk.
Judging panel-ah hian Filipino fashion icon leh influencer Michael Cinco, Venezuelan-American actress-singer leh content creator ni bawk Elenora “Lele” Pons, Cuban-American music icon Emilio Estefan, Miss Austria leh Miss Europe te pawh lo ni tawh, 1977-a Miss Universe 1st runner-up Eva Cavalli, Mexican journalist leh TV host Jessica Carrillo, Mexican designer Gabriela Gonzalez, Italian billionaire, sumdawng, DJ leh social media star Gianluca Vacchi, Miss Universe 1978 Margaret Gardiner, Canadian beauty queen Nova Stevens, singer-actress Fariana, art collector Gary Nader (ani hi Lebanese zinga Miss Universe judge hmasa ber a ni) leh Cuban philanthropist, dentist leh social media influencer Camila Guiribitey te an thuho.
Victoria Kjaer hi professional dancer leh entrepreneur niin, kum 2004 khan Soborg, Copenhagen-ah a piang a, business & marketing-a bachelor’s degree nei a ni. Lâm lamah a inhmang viau chung hian mental health leh nungcha humhalh kawngah te pawh a inhmang hle a, beauty entrepreneur ni chungin law lama degree neih a la tum tho a ni.
Victoria hi Miss Denmark niin, 2022 khan Miss Grand International-ah Top 20-ah a lo lang tawh a, September 2024 khan Miss Universe Denmark-ah thlan a ni. A hmel leh pianziaah Barbie nautelem a ang riau a, a hminglemah ‘Human Barbie’ an ti a, hei hi a larpuiin, fan favorite a nih phah ta bawk a ni.
Victoria hi a hmelthat leh piannalh mai bakah a thluak pawh a tha hle a, final round zawhna leh chhanna hunah Miss Universe ni tura quality pawimawh a tih ber an zawhna chu, “Miss Universe chu midangte dinmuna indintir thiam leh a taka che thin entirna a ni tur a ni. Khawvelin harsatna a hmachhawn te hmuhthiam a, a dinhmun chu danglamna thlen thei turin a hmangthiam tur a ni. Au chhuak ve thei lo te, nungcha emaw mihring an ni emaw, puitu mamawhte tan a au chhuak thei tur tihna a ni,” tiin a chhang.