Daily Newspaper

Missionary rukbote him takin tlanchhuak

59

Missionary sawm pahnih Haiti a rukbote chuan anmahni rubotute tlanchhuahsan theiin him takin an awm tiin US-a inbun missionary tirtu Kohhrante chuan an sawi.

Missionary-te hian zanah rubotute hi tlanchhuahsanin arsi chu hnimpik taka an kalnaah navigation atan an hmang tiin kohhran thupuangtu chuan a sawi.

Christian Aid Ministries-te chuan heng missionary October thlaa rukbote hi an vaiin him taka an awm thu a puang bawk a. Heng missionary rubotu gang te hian pakhat zel tlan nan $1 million an phut a ni.

Rukbo an nih lai khan missionary leh an chhungte 17 lai an ni a, hnuchham chawmna In an tlawh haw lam rukbo niin an zinga panga chu chhuah zalenin an awm thung.

“Hun remchang nia an hriatah kawngka hawngin an khar zui a, ngawi renga an kalna tur thlansa zawhin rukbo an nihna hmun an chhuahsan thei a ni” tiin kohhran thupuangtu Weston Showalter chuan Ohio-a news conference a neihnaah a sawi.

Rubotu guard tam takte pumpelh theiin a hmaa an hmuh tawh tlang lam panin arsi rual te chu guide-ah hmangin an pan a ni, tiin a sawi bawk.

Missioanry rukbo zingah hian nupa, thla 10 mi naute leh naupang kum 14 leh 15 te pawh an tel a, puitling mipa pali leh hmeichhia pahnih an tel bawk.

Thinghmun leh hnim pik tak tak leh rualrem lo zet zet an paltlang a ni, tiin Showalter chuan a sawi bawk.

An tlanchhuah laiin an zinga naupangte pawh ngawi rengin an awm a, naute pawh hling ten a chhun loh nan kawrin an tuam tiin a sawi bawk a. Darkar hnih chuang gang territory-ah an awm hnuah khawfing chah dawnah mi pakhat phone nei an tawn thu an sawi a, ani’n thuneitute a hrilh zui ta a ni.

Missionary-te hi Florida-ah US Coast Guard flight hmanga phurh nghal niin an a zavaiin him takin an chhungte nen an inhmu tawh bawk.

Gang-te hian chaw leh tui in tur thianghlim an pek thu sawiin nausen ei tur pawhin baby formula an pe bawk a. Mahse, insilfai nana an tui pekte erawh thianghlim lo thungin missionary thenkhatte chuan thosi sehna avangin vun pan an nei bawk.

“Missionary-te chuan tum tam tak gang leader hnenah huaisen takin Pathian chungchang hrilhin, gang member an nih chhunzawm reng chuan Pathianin an lakah hremna a lekkawh tur thu an hrilh a ni” tiin Showalter chuan a sawi a, hren an nih lai pawhin darkar 24 chhung tawngtaia hun an hman reng thu a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy