Missionary te chetdan dan kalh a ni lo ti

Missionary tena Kristianna an thehdarh chu dan kalh tia ngaih chi a ni lo, tiin Tamil Nadu sorkar chuan Supreme Court hnenah a sawi.
“Constitution Article 25 (sakhua zalenna) chuan mi tute pawh an vawn sakhua an thehdarh a remti a. Hei vang hian missionary tena Kristianna an thehdarh chu dan kalh anga ngaih chi a ni lo. Mahse, an sakhaw thehdarhna lama an chetdanin public order, morality emaw leh Part III of the Constitution kalh a nih chuan chu erawh ngaih thutak ngai a ni,” tiin State chuan a sawi.
Mi tu pawhin a rinna chungchang chu hlauhna, vauna, bumna, tawktarh, puithuna emaw black magic hmang lovin a thehdarhin a kalpu thei a ni, tiin a sawi bawk a.
Tamil Nadu aiawh hian senior advocate P. Wilson chu dingin mi tumahin a sakhua vuan ve turin midang tihluih theihna fundamental right a nei lo. Mahse, tu pawhin a vawn sakhua thehdarh turin dikna a nei a ni, a ti bawk.
Chutiang bawkin Constitution chuan a duh sakhua a vawn leh inleh a khap lo tiin Tamil Nadu State chuan a sawi bawk a. Mi tu pawhin a rinna a sawhsawn thei a, a sakhaw vawn hmasakah pawh a let leh thei tiin State chuan a sawi bawk a.
“He ram mipuite hian an duh sakhua an vuan thei a ni. Sorkar berin khua leh tui te mimal rinna leh privacy ah harsatna a siamsak tur a ni lo” tiin Tamil Nadu chuan a sawi bawk a.
Mahni sakhua duh vawn theihna chu Constitution Article 21 (right to dignified life) ah chiang taka tarlanin a awm a ti bawk a. “Bawhchhiat theihloh right a ni” tiin affidavit chuan a tarlang bawk.
Tamil Nadu state chuan advocate Ashwini Kumar Upadhyay, Tamil Nadu a kum 17 leka upa hmeichhe tleirawl Krsitiana inleh luih tir tia puh leh nunna chan thihna chhan dik tak chhui chian a phuta a khinna a chhanna a ni a. Petition chuan tihluihnaa sakhuaa inlehtirna chu fundamental rights bawhchhiatna a ni a ti a.
Tihluihnaa sakhuaa inlehtirna Tamil Nadu-ah a thleng lo, tiin State chuan a sawi zui a. “Mirethei zawk te tihthaihna, hlauhna, vauna, bumna, tawktarh, puithuna emaw hmanga sakhua inlehtirna a awm hriat a ni lo” tiin State chuan a sawi bawk.