Aizawl Municipal Ward No.IV councillor Laltlanzova Khiangte chuan Inrinni khan a bial chhunga thing leh cement mistiri 87 te hnenah mistiri bungrua a sem.
AMC Ward IV-a Ramhlun South, Ramthar North, Ramthar leh Aizawl Venglai atangin eizawn nana hmang mistiri-te hnenah bungrua sem a ni a. Councillor hian hrileng inkharkhip tirhah a bial chhunga puanthui thiam mi 115 hnenah puanthui khawl a lo pe tawh bawk.
“Mipui aiawh ka nih chhung chuan mipui tan a theih ang angin ka tang zel ang. Covid-19 len lai pawh hian duh angin sum a tam thei loa, kan tih theih ang angin ka tang ve a ni,” Laltlanzova Khiangte hian a ti.
Thiamna danglam bik an neihte chu hmasawn nan hmang turin a chah.
