Mizoram Board of School Education leh Social Welfare & Tribal Affairs tangdun buatsaih high school-a mitdel zirlai naupangte hman tur Braille textbook sem a ni.
He textbook semnaah hian Special Blind School Durtlang, Integrated School Kolasib, Persons with Disabilities commissioner Vanlaldiki Sailo bakah MBSE officer-te an tel a. MBSE chairman JH Zoremthanga chuan NIEPVD (National Institute for the Empowerment of Persons with Visual Disabilities) hnuaia awm Central Braille Press thawktute MBSE nena thawh ho dan tur leh, Mizo naupangten Braille textbook leh large print textbook an neih ve theih dan tur a lo sawipui tawh tih a sawi a. Nikuma mitdel lehkhabu, higher secondary zirlai mi panga hnenah School Education minister-in a lo hlan tawh thu a sawi bawk.
Tun tuma Braille textbook sem hi Tribal Art Centre Tanhrila bun Braille Press, Social Welfare & Tribal Affairs hnuaia print a ni a. MBSE chuan academic session (2023- 2024) kal mek atan zirlai zinga mitdel awm zat data lakhawm turin Special Blind School Durtlang leh Integrated School Kolasib-a an zirlai neih zat a zawt a, hemi rual tho hian mit lama harsatna nei, lehkhabu pangngai chhiar theilo (low vision student) te data pawh district tina DEO-te hnen atangin lakkhawm a ni a, an ni tan hian large font print textbook buatsaih tum a ni.
Lehkhabu semte hi Special Blind School Durtlang atangin class IX naupang pathum leh class X naupang pathumin an dawng a. Integrated School Kolasib atangin class IX zirlai pakhatin a dawng.
Mitdel zirlaite tan Braille textbook
