Daily Newspaper

Mite thinhrik politician nih ve tum lo

10

Politics chu mahni hmasialna leh hausak tumna vanga luhchilh a nih loh thu leh mite thinhrik deuh ang chi nih ve a tum loh thu Congress MLA Lalrindika Ralte chuan a sawi.

Hachhek bialtu MLA Lalrindika Ralte hian a bial chhung khaw thenkhatah Congress party-a mithar a lawmluh bakah kum upate hnenah Krismas thilpek a hlan a. Hengah te hian thu sawiin, mahni hmasialna leh hausak tumna avanga politics-a lut a nih loh thu leh Mizo mipuiin politician tam tak an thinhrik deuh ang chi nih ve a tum loh thu te, mi beidawnna siamsaktu nih chu Pathian hnena a inhlan dan pawh a nih loh thu te a sawi.

Khawvel ram hrang hrangah leh India ram ngeiah pawh miten ram leh hnam hmasawnna atan politics chu hmanraw pawimawh taka an hman theih lai leh phurna tam tak petu a nih laiin, Mizoramah politics-in phurna tak tak min pe ve thei ta lo chu pawi a tih thu a sawi a. “Thusawi thiam avanga mi hneh theih hi tha viauin lang mah se, hmangaihna a tel loh chuan hlutna a neilo,”, a ti. Politics chu thiam taka sawi ropui vak chi niloin, ram leh hnam hmasawnna tura a taka thawhna tur a nih zawk thu leh Mizoramin a mamawh chu a tak taka thawh a nih thu te a sawi bawk.

Englai mahin a bial mipuite a phatsan ngai dawn lo tih Hachhek bialtu MLA hian a sawi a. “Min ringtawk ula, in lakah ka rinawm em tih leh ka rintlak em tih hi mih fiah thin rawh u,” a ti.

MLA hian Hachhek biala khua zawng zawng, khaw 32-a kum 70 chin chunglam mi 1127 hnenah lukhum lum, shawl leh mawza lum Krismas thilpek atan a hlan a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy