A sikul kal tirh a thlir let a, a hreh theihzia, bansan
hial a tum thinzia te, a nuin a hruai luih thin lai te, tap chunga sikul a kal lai te a ngaihtuah a, chung chu tunah chuan a hlimpui ta.
|ap chunga sikul a kal lai, a duh lo chung chung a nuin a hruai luih lai hi a naupan lai a ni lo a, KG a zir tirh ni lovin high school a kal tirh, pawl 9 a zir tirh a ni.
Raltlan an ni a, Myanmar a buai avanga Mizorama tlanchhia, Farkawn-a an chhunga awm ta an ni. 2021-ah Farkawnah an awm tan a, sikul luh a lo hun a, Mizoram sorkar leh khawtlang duh danin raltlan naupang dangte ang bawkin sikul a lut ve a, mahse hrehawm a ti lutuk; ban daih a duh a, mahse a nuin a remti si lo.
Rampengthua a ni a, an khuaah pawl 7 a zo hman. A nihna takah chuan Farkawn-ah hian pawl 8 zir tur a ni a, mahse a u tel lova kal a ngam loh avangin a u te pawlah pawl 9-ah a thu ve ringawt.
Kawl tawnga lehkha zir thin an ni a, English-ah harsatna an tawk nghal. Mizo subject-ah an buai bawk; a chhiar thiam lo a, a ziak thiam hek lo. Mi thar, chutah pawh tlanchhia nih nak alaiin sikulah chuan a rilru a mikhual em em mai a, kal zui pawh a duh ta lo.
A u pawhin sikul kal chu hrehawm a lo ti ve a, an dinhmun a inang diak diak ang. Sikul kal chhunzawm loh an tum ta a ni. Mahse nu berin rem a lo ti tlat lo.
Rama te unau sikul kal duh lo chu a nuin a tir lui a, hruai rual an ni tawh lo chungin a hruai lui ta ngat ngat mai. An hreh em em a, mahse nu te thu an hnial ngam lo; tap chungin sikul kawng an zawh ta thin a.
A AW B an zir a, an pawlpuite’n pawl 1 an nih laia an thiam tawh kha anni chuan an zir tha leh. Mizo subject zir thei turin A AW B atanga an tan a ngai a, a ziah leh a chhiar an zir chawp ta a ni.
Tun hnaiah MBSE buatsaih HSLC result a chhuak a, Rama hi distinction-ah a pass. Chhiarkawp, science leh Mizo-ah letter a hmu. Pawl 8 a bawhkan a, middle school zir chhuak lovin high school a zawm ve tawp. Chu pawh A AW B atangin. A u Iangtintlemi pawhin distinction-ah a pass a, chhiarkawp, science leh Mizop-ah letter a hmu.
“A tirah chuan hrehawm kan ti lutuk a, sikul kal pawh kan duh lo a, chawlh kan tum a. Mahse ka nuin a phal lo a, min kal luihtir a,” Rama chuan a ti a, “Min hruai lui a, tap chungin kan kal thin,” a ti bawk.
Chung lai hun chu a ngaihtuah let a, a lung te pawh a tileng. “A chang chuan ka nuih a za a, ka lung a tileng thin. Ka nuin khatiang khan min lo tir lui a, ka ngaihtuah let chang pawhin ka lawm thin. Min lo tir lui lo ang tih ka hlau,” tiin a sawi. “Mittui tla chunga tuhte chuan hlim takin an at ang,” tih ang mai kha an ni e.
An awmna khaw mipui an fak a, an zirtirtute leh zirlai dangte an fak bawk. “Min en hrang lo. A khaw mi angah min ngai a, keini pawhin tualchhung mi-ah kan inngai,” Rama chuan a ti a, “Kan zirtirtute an fel a, kan thiam loh pawh kan zawt ngam a, kan thiam loh an hlau,” a ti bawk.
Mittui tla chunga tuhtuin hlim takin an at
