Mizo basketball player-te India ram pawnah

Mizo basketball player-te India ram pawnah
English media-ten uar uchuak leh nasa taka an ram infiammite chungchang an fak rawn luih luihna leilungah khuan kan Mizo basketball player-te hi awm ngat se, an phu loh leh phak bak bakin fakna an tawng ngei ang.
Amaherawhchu, Mizo tribal zia hian a phu te chawimawi leh phochhuah kawngah hian thatchhiatna leh rilru zau tawk lohna a la buan let hneh meuh lo!
Sawiselna kawnga thahrui tha hle si hi, fak phu te itsik tawk lah thler tinah kan la ther fur – he zia hi a tangkai lo asin aw.
Tun tumah hian Bangkok atanga sawmna duhawm tawng leh tawk Emmanuel VL. Awmpuia (Khatla TBL player) leh Mizo player thahnem tak ten India ram pawna sawmna an hmuh dan chipin chik takin in han khel teh ang.
Chhinga Veng tlangval bengvar leh Chhinga Veng BC coach ni mek bawk, Ronald Rothlengliana chuan Mizoram Super League (MSL) 11 tan hma khan an club Chhinga Veng BC player tur dapin player siksawi kawnga hmalatu (agent) hnam dang 20 chuang nen thuk leh thui takin inbiakna an nei a, chumi kal zelah chuan a biak agent thenkhat chuan Mizo player-te chu India ram pawn, Asia khawmualpuia ram thenkhata khel thei turin titi an vawrhchhuak nawlh!
Agent lam nena an inbiakna hmasa berah Bangkok lama basketball league khel turin tunlai Mizo star player zinga thawm nei lian ber pakhat, Nursery veng tlangval Emmanuel VL. Awmpuia hming chu a ri ring hle a, Ronald-a leh agent ruahmannain Bangkok-ah Mizo val hi November thla chawhma lama tournament hmachhawn turin tihfel a ni. Hemi hnu hian Mongolia-ah inkhel tur a la ni cheu.
Emmanuel-a hian a club tan MBBA buatsaih Favang Tournament a khel a, semi finals-ah an zing kawng a tawp! Mimal hmachhawn tur kawng erawh a inhawng zau zual zui sauh; mahse, passport a buaipuina kawngah erawh harsatna a tawk tlat – ruahmanna awm sa a zuzi tan a, December thlaa tournament-ah erawh document a chinfel hman chuan a thlawk chhuak thei dawn e.
Ronald-a leh agent lam inbiakna a kaltluangin Mizo baller tan vanneihna kawngkapui a inhawng zau telh telh a, Bangkok mai ni lovin Mongolia boruak hip theihna remchang a awm zui.
Mizo star player Ronald-a hian a be zui zel a, club lamah top player-ten contract mumal tak an ziah miau avangin Zopa rinawmna a langsar zel a, off season te a nih loh chuan tun dinhmunah chuan India ram pawna inkhelh theihna leh sum tam zawk hlawh tura pen chhuak turin tihngaihna a awm ta rih lo!
The Aizawl Post Hoops Mania chuan Ronald-a biak Mizo top player-te hi a hriatpui a; amaherawhchu, India rama tualchhung league ropui ber ‘Mizoram Super League (MSL)’ khel lo tura India ram pawna thlawhchhuah hi – Impossible!
Heng karah hian Mizo basketball than nasat zia erawh hi mit nei tan hmuh loh chi rual a ni lo va, beng nei tan hai der chi zu ni suh!
Tualchhung Mizo basketball thut hmun insawhnghet zelah hian MBBA, club leh mi tam tak thawhhona faka thurchhuah tur an awm. Mizo leh Asia khawmualpui basketball hmanga inthlunzawm zui zel tur hi ngaihchan tham thu thar duhawm i lo bengkhawn zui tlang zel teh ang u.