Management team leh Zothan Autoworks chuan thuthlung an lo neih sa tawh angin LPS Pro Fight 2023 title sponsor ni turin inremna an siam fel a, Mizo boxer-te tan thawhho zel tha an ti.
October ni 2 khian LPS Arena, Falkland Veng, Aizawlah Pro Fight vawi 10-na tan a ni dawn a, championship hnuhnung vawi ngaah a tum lina’n Zothan Autoworks-in title sponsor an chang dawn.
Mizorama Tata Motors commercial vehicle dealer Zothantluanga chuan, “Mizo thalaite tan thil tha leh mipui hlut a ni a, kawng hrang hrangin Pro Fight-a tel theih hi a hlawk hle a ni,” a ti a, nikum khan Title Fight-ah Pro Fight an sponsor zui dawn tih a lo puang tawh a ni.
Kumin March ni 10 leh 11 khan Dawrpui Multipurpose Centre, Aizawlah Mizo boxer-te’n professional inhnek tam zawk an neih theihna’n LPS Fight Night 3 huaihawt a ni a, hetah hian Zothan Autoworks nen thawkdun chhunzawmin kumin Pro Fight title sponsor ni turin thuthlung an siam tel.
Kum 2016 khan a vawi-khatna’n Zothan Autoworks leh Management team an thawk-dun tan. Kum 2017-ah Gionee an tlazep tih loh kum 2019, 2022 leh kuminah inremna siam zui lehin title sponsor an nih zawn vawithumna a ni nghal dawn a, Mizo boxer-te’n hma an sawn zual zel theihna’n thawhdun zel tha an ti.
August ni 15 atangin LPS Office, Zarkawtah Pro Fight-a tel tum tan pakhat cheng sawm zelin form a lakchhuah theih dawn a, September ni 20 thleng thehluh theih a ni ang.
Mizoram chhung leh pawn atangin kum 17 chin chunglam a duh apiang tan weight hrang panga – fly (kg 48-52), bantam (kg 52-56), light (kg 56-61), welter (kg 61-67) leh middle (kg 67-74)-ah tel theih a ni a, weight tina champion hnenah kawng-hren thar hlan a ni ang.
Mizo boxer-te tan LPS leh Zothan Autoworks inthlung nghet deuh deuh
