Prevention of Corruption Act Special Court judge chuan Mizo Carbon Product subsidy eiruk thubuaiah mi pali thiam loh a chanter a, kum hnih chhung lung in tang tur leh Rs. 150000 chawi turin a hrem.
Sawrkar laipuiin hmarchhak biala thil siamchhuahna tih hmasawnna atana a ruahman, Central Transport Subsidy (CTS) leh Central Capital Investment Subsidy (CCIS) a pek chu Industrial Growth Centre Luangmuala hmun nei nia insawi Mizo Carbon Product Ltd chuan dan dik loin cheng vaibelchhe 3.41 vel an la tawh nia sawi a ni a. Subsidy dawng tur hian coke siam chhuahna tura hmanrua, phurhkualna leh lehkha dang chu lehkha lem hmanga lak vek niin a sawi a ni.
Thubuai hi kum 2017 atang khan court-ah hian ngaihtuah tan a ni a. Thubuaiah hian mi 17 puh niin, court hian mi 13 erawh thiam loh chantirna tur khawp finfiahna tha a hmuh loh avangin, a meizang hlaptu nia hriat pali – Ravi Gulgulia, Guwahati; Vimal Kishore, Silchar; Pramod Bharech, Kolkata; Sandeep Agarwal, Guwahati chu thiam loh a chantir thung a ni.
Thiam loh chantirte hi case pahnihah thiam loh chantir an ni a, case pakhatah hian kum hnih tang tur leh cheng nuai khat chawi theuh tura hrem an ni a; case dangah hian thla 6 tang tur leh Rs. 50000 chawi tura tih an ni. Hei hi la kawpin court hian kum hnih tang tur leh sumfai Rs. 150000 chawi turin a ti a ni.
Mizo Carbon thubuaia thiamloh chantir mi pali hremna tichhuak
