Mizorama lâm zirna mumal taka kalpuitu hmasa, Mizo Dance Camp (MDC) dintu leh MDC creative director ni bawk Alan Lalrinawma, kum 32, chu August ni 5, 2025, zan dar 8:20 khan Ebenezer Hospital-ah a boral a, Electric Veng, Aizawl-a an chenna-ah lumen niin, nimin chhun khan St. Mary’s Church, Electric Veng-a vui a nih hnuah Electric veng thlanmualah phum a ni ta a ni. Alan-a hun hnuhnungah hian Mizo rimawi khawvel leh entertainment lama a thawhpui thin mi thahnem tak an tel a, Music Domain Mizoram member ten vuinaah programme-ah Alan-a pualin zaipawl an nei bawk.
Alan-a hian talent a nei tha hle a, Mizo ten lam kan thlir dan pawh a rawn tidanglam thei hial a ni. Mizo Dance Camp hi May ni 31, 2014 khan a din tan a, a thiantha tlem a zawng te nen bul tanin, class te hawngin zirlai te neiin, lian vak loin bul a tan a, a kum telin MDC chu a thang duang ta le a, scholarship audition te siamin member thar kumtin lak thin a ni a, chùngte nen chuan show hrang hrang Zonet, Thazual Award, Fashion Show, MSL Halftime Show, Taekwondo Fight League, Lelte Award, Anthurium Festival, Winter Fest, Youth Fest, Guwahati Gupshup Music Award, Coffee Nite leh show hrang hrangah te an lo in lan tawh thin a ni.
Competition hrang hrangah Alan-a hian anau te hi Zo Nation hmingin state dangah a telpui thin a, a hmasa ber atan 2016 HHI (Hiphop International ) Mumbai a neihah a telpui a, 2018 khan World of Dance India Region Chennai a neihah Best Costume a lakpui tawh bawk a, 2019 PODS (Power of Desi Streets) Mumbai a neih-ah final lutin, 2020 HHI (Hiphop International)-ah India region Silchar-a neih-ah Final a luhpui tawh bawk a, 2022 Battle Yaa Skills Vol. 4 Bengalore-a neihah Final a luh pui leh bawk a, 2023 PODS Mumbai a neihah semi-final lut lehin, 2024 Beginning Delhi a neihah semi-final luhpuiin, Alcheringa Guwahati-a neihah 1st Runner up a nih pui tawh bawk a ni. Hemi piah lamah hian ‘Z Academy’ Dance Drama series, ama direct leh produce 2022 a tihchhuah chu ama Youtube Channel ‘Alan Rinawma’ lamah en theihin a dah bawk a ni.
Rampum huap Faklam Intihsiak Synod-in a buatsaih hmasak ber, 2015 khan Alan-a hian Ramthar Veng Presbyterian Kohhran K|P te chu Pakhatna a nih puia, hmanni lawka Ramthar Veng Presbyterian Kohhran-a Kristian |halai Pawl Ram Pum uap Faklam Intihsiak-ah pawh khan taksa chak lo tak chungin chief judge angin a tel a, kha kha hetiang lama a hniak hnuhnung ber a ni dawn ta a ni.
Alan-a hian YouTube lamah record siam a nei a, Luis Fonsi leh Daddy Yankee te hla ‘Despacito’ hmanga a choreography, YouTube-a an dah chu Mizo YouTube channel zinga million views nei hmasa ber a ni a, hemi hnuah pawh hian YouTube lama vawi maktaduai en hlawh thei dance video a neih belh leh nual a ni.
Alan-a hi October 2024 khan a nuamsam lo tan a, doctor te rawnin, in lamah an inenkawl a, mahse, hma a sawn hleihtheih loh avangin Ebenezer Hospital-ah an inentir leh a, hetah hian Ril TB a nei tih an lo hrechhuak a, damdawi inah awm zui nghalin, ICU-ah te enkawl ngaiin a awm a, Krismas leh Kumthar pawh damdawi inah hmangin, kumin January thla tawp lam khan mahni in lama inenkawl chhunzawm turin a rawn chhuak ta a ni.
Damdawi in atanga a chhuah hnu hian hma a sawn ve hret hret a, mahse, July ni 23, 2025 khan zing karah khawsik kaih ang deuhin a awm thut a, nikhaw hreloin a awm zui a, Ebenezer Hospital-ah bawk luh pui leh nghal a ni a, HDU-ah enkawl a ni a, ni thum hnuah rawn harh chhuakin, HDU atangin cabin-ah sawn luh a ni a, hma a sawn zel dawn emaw tih laiin August ni 3, 2025 zingah khan nikhaw hre lovin a awm leh a, ICU-ah dah luh niin, doctor leh nurse ten theih tawp chhuahin an enkawl a, mahse, that lam a pan hleithei ta lo a, August ni 5, 2025, zan dar 8:20 khan a kal ta a ni.
Mizo Dance Camp dintu Alan Lalrinawma a awm ta lo
