Mizo hnam tobul chhui dawn
Art & Culture department kaltlanga din ‘Committee on Hnam Tobul Zawn Chhuah’ chu an chairman, chief minister Lalduhoma hoin a tum khatna atan Thawhlehni khan an thukhawm a. A taka thawktu tur mithiam dap hna chu Art & Culture department kuta dah a ni.
Chief minister chuan, sawrkarin a pawmpui tlak hnam tobul leh chanchin kimchang zawk, Mizo hnam peng hrang hrang huapzo, tunlai thiamna thar ber ber hmanga ril zawka chhui tul an tih thu a sawi a. A tul a nih chuan hnam dang mithiam rawih huamin, scientific taka chhui a tulna kawngah pawh inhawng takin hma la turin a chah.
Art & Culture minister C Lalsawivunga pawhin, he hmalakna hi mithiamte rinchhan hmalakna a ni, tiin, a thiam leh tui, inpe taka hna thawk thei tur an mamawh tih a sawi a ni, a ti.
A bul tan dan tur an rel a. History chhui dan peng hrang hrang hmanga hma lak a nih theihnan a taka hna thawktu tur mithiam fawmkhawm phawt nise, an ti a. Art & Culture minister kaihhruaiin an department chuan an tam lam bituk nei loin hnathawk thei tur mithiam zawng hmasa se, an inpeih hunah thutkhawm leh nise, an ti.
An hnathawhna tur sum mamawh chu sawrkar laipui Ministry of Tribal Affairs hnuaia Support to Tribal Research Institute atanga hmuh theih inbeisei a ni.
Mizo hnam tobul chhui dawn
