Mizo pa zingah pawh a te pawl ni chunga infiamna hrang hrang thei em em F. Zokima chu nimin khan a chenna Chaltlang Lily Vengah vuiliam a ni a, Mizoram Badminton Association (MBA) chuan Mizoram badminton tana a thawhhlawk thu tarlang chungin uina thuchhuah an siam.
MBA thuchhuahin a tarlan danin:
“BWF World Senior Championship-a India tana lo inlan tawh leh vawi tam tak Mizoram aiawha National Masters Championship-a medal lo dawng tawh thin Pu F. Zokima, Chaltlang Lily Veng chuan kum 77 mi niin, cancer natna avangin vawiin, April ni 22, 2026 (Nilaini) hian chatuan ram min pan san ta.
“Pu Zokima hi kum 2013 khan BWF VI World Senior Badminton Championship 2013-ah India aiawhin Turkey-ah a lo inlan tawh a; kum 2017-ah BWF World Senior Badminton Championship, Cochin, Kerala-a khelhah India tan a inlan tawh bawk.
“Mumbai-a 37th Veterans National Badminton Championship 2013 nghah a nih tum khan 60+ Men’s singles category-ah silver medal a lo vawchhuak tawh bawk a ni.
“Mizoram Badminton tana mi hlu leh national level-a Mizote tana sulsu hmasatu, badminton game chawilara, Mizoram tihmingtha thintuin natna khirh tak tuara chatuan ram min pansan ta hi a pawi kan tiin kan ui tak zet a ni.
“He hun thim leh harsa tak karah hian a chhung leh khat, thenrual thate’n Pathian thlamuanna leh awmpuina an chan ngei theihna’n Mizoram Badminton Association chuan a dilsak a ni. Mual a liam, nghilh erawh a ni lo ang,” tiin.
Mizoram chhim lama khaw nuam leh infiam thei khua zinga pakhat South Vanlaiphai khaw chhuak F. Zokima hi Mizote zinga hockey khel thiam hmasa zinga mi ni bawkin, vai ramah pawh hnamdang palian pui pui kara hmuhnawm leh chhuanawm taka hockey game lo khel tawh thin a ni.
National level badminton inelna bika F. Zokima’n lawmman a lak MBA chhinchhiah theih dangte chu
a hnuaia tarlan ang hi a ni.
1. Silver medal (65+ Mens Singles): 40th Masters National Badminton Championship 2016, Coimabatore,Tamil Nadu
2. Silver medal (65+ Mens Doubles): 40th Masters National Badminton Championship 2016, Coimabatore,Tamil Nadu
3. Silver medal (65+ Mens Singles): 41st Masters National Badminton Championship 2017, Cochin, Kerala
4. Bronze medal (65+ Mens Singles): 42nd Masters National Badminton Championship 2018, Vishakapatnam
5. Gold medal (70+ Men’s singles): Yonex-Sunrise 45th India Masters Veteran National Badminton Championship 2023, Goa