Daily Newspaper

Mizo nena chenho duhlote Mizo bula dah tumna pawm lo

31

Mizote nena chen ho duh loh vanga Mizorama haw duh lo Tuikukte chu Tripura sawrkarin a ramchhunga Mizote awmna Zampui Tlangah dah a tum tih Mizo Zirlai Pawl chuan a sawi a. Mizo nena awm ho duh lo Mizo bulah bawk dah tum chu an pawm thei lo tih an sawi.

MZP Gen. Hqrs. thuchhuak chuan, Tripura Tuikukte an awmhlenna tura sawrkar laipui, Tripura sawrkar leh Mizoram sawrkarin remna thuthlung an ziak chu lawmawm a tih rualin, Tripura sawrkarin an state chhunga Tuikukte inbenbelna hmun atan Mizote chenna, Zampui tlangdung hman a tum chu tihhlawhtlin a nih loh nan hma a la dawn tih a sawi.

Tuikuk-te chu an duhthu ngeia Mizoram chhuahsan, dawta Mizote heka puh zuitu an Union Home ministry leh Mizoram sawrkar pawhin vawi tam Mizorama an lo let leh theihna tura kawng dap a, Mizorama hruailuh tuma hma lak thin a ni chungin, Mizorama awm duh loin Tripura-a awmhmun khuar an duh zawk vanga awmnghet tur tur an ni tih MZP chuan a sawi a. Hmasang atanga Mizote luah ram, Zampui tlangdunga Tuikuk khaw thar din tumna leh chhungkaw 6000 chuang dah tuma hma lakna a awm chu pawi a tih thu a sawi bawk.

‘Tuna Tripura-a Tuikuk awmhlen turte hi Mizorama awm duh lo, Mizote nena chenho duhlote an ni a. Mizote nena chenho duh tawhlo Tuikuk-te Zampui tlanga Mizote nena chenho tir tuma hma lak a ni leh si,’ a ti.

Mizote a chhe thei ang bera chhuaha Mizo hnam pawi tam tak sawitu, Tripura-a awmhlen tur Tuikukte Zampui tlanga inbenbel tir chu MZP chuan a duh lo takzet, tiin, ‘Zampui Tlangdunga Tuikuk khaw thar din a nih chuan chi leh chi inkarah innghirnghona tawp thei lo a thlen kan hlau a. Tripura sawrkar pawhin a thil tum hi sutin Zampui tlangah Tuikuk khua din lo turin kan ngen a. Chu chu hun lokal zel tura Tripura ram ralmuanna atana thil pawimawh tak pawh niin kan hria,’ a ti.

Kum 1998 khan hmasang atanga Zofate luah ram, Mizo khaw pasarih Tuikukte avang hian chan a ni tawh tih MZP hian a sawi a. ‘Heng Mizo khua – Sakhan Serhmun, Sakhan Tualsen, Upper Dosda, Satnala, Sakhan Tlangsang, Bancherra leh Lungthirek te hi Mizote luah khua a ni thin a, Tuikuk-te hian an in leh lo chhuhsakin an lo umchhuak tawh a. Zofate luahchin ram hi Tuikukte avangin khap khat pawh chan leh kan remti tawh lo a. Zampui Tlang Tuikuk khaw din tuma hmalakna pawh hi a tawp thlengin kan do dawn a ni,’ a ti.

Mizote chimral tuma Tripura sawrkar hmalak mekna hnuhkir a nih theih nan hma la turin Mizoram sawrkar leh thuneitute MZP chuan a ngen tih an thuchhuah hian a tarlang bawk.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy