By Mahmuaka Chhakchhuak
Tuna Eight Schedule-ah hian tawng chi hrang sawm hnih leh pahnih a awm mek a, chungte chu; Assamese, Bengali, Gujarati, Hindi, Kannada, Kashmiri, Konkani, Malayalam, Manipuri, Marathi, Nepali, Oriya, Punjabi, Sanskrit, Sindhi, Tamil, Telugu, Urdu, Bodo, Santhali, Maithili leh Dogri te a ni. A Mizo tawng pawh hi dah luh turin buaipui mek a ni a, nimahsela hei hi thil har tak tur nia hriat a niin mahnia script neih kher a ngai ni awm tak a ni. Keini leh Khasi leh tlangmi hnam tam takte hi chuan Roman Script vek kan hmang bawk si a, keini aia Eight Schedule-a telh tura buaipui hmasa zawk Khasi ngei pawhin an la buaipui mek zela an la hlawhtling bik rih lo chu a nih hi. UNESCO lamin tawng ral mai hlauhawm tia a tarlan tam tak zingah 600 chu India ram chhunga kan tawng hmante a ni (March 29, 2022). Heta tarlan zingah hian Gangte tawng ngei pawh kum 2011-ah khan hmangtu mi 17,542 chiah awma chhinchiah a ni a.
Kan tawng, Mizo tawng ngei pawh hi tawng ral mai hlauhawm (Endangered languages)-ah min telh sakin Mizo language is critically endangered since the youngest speakers are grandparents and older, and they only speak it occasionally. There are no more speakers of this language tiin a sawi a. Hetianga a lo sawi takah phei chuan nasa lehzuala kan tih hausak deuh deuh a, a hmangtu pawh a pun zel hi thil tul leh pawimawh tak a ni. Hetianga ral mai hlauhawma a puanna chhan hi han chhui zui ila; tawng vawnhim kawnga kan taihmak tawk loh vangte, kan tawng ngeia ziak theih reng hnam dang ttawng, a bik taka Sap tawnga ziak kan uar vangte leh kan naupangte ngei pawh Mizo tawng kan zirtir tam tawk loh vang nia hriat a ni. Hemi thil pathum lek pawh hi inhmuhchhuahna atana hmang a, tan la thar ila chuan Mizo tawng hi ral mai hlauhawm dinhmunah a ding hauhin a rinawm loh.
|awng vawnhim kawnga kan taihmak tawk loh vang:
Hei hi thil pawi tak a ni a, social media leh mahni inchhung khur ngei pawha tawng vawnhimna kawnga kan tan lak lohziate pawh hi kan hre theuh awm e. Mizo tawng hi kan pianpui tawng a ni a, hei lo chu Mizo hnam hian ttawng dang kan nei ngai dawn lo a, hei lo chu keini hian pianpui tawng kan nei dawn hek lo. Chuti chung chuan kan pianpui tawng ber Mizo tawng chu vawnhimna lamah tumah reng reng hian tan lak kan tum lo a, tawng hi thil nung anga che reng a nih ve avang hian kum sawm kal ta leh tun huna kan tawngkam bungraw hman danglamzia atang hian kan hre thei awm e.
Nausen a lo piang a, a tawng theih hma hauh atangin nu leh pa mai bakah a lawmtu apiangin tawng pai lek lek, Mizo tawng dik chiah loin kan han lawm a, hetiang atang daih tawh hian tawng vawnhim kawnga kan tan lak lohzia chu a hriat theih. Eng vangin nge nausen chu Mizo tawng dika kan lawm a, kan chhaih mai lohna chhan hi han ngaihtuah ila a ropui lo viau mai thei e. Chu chu kan ching chhunzawm ta reng em ni tih tur a ni a, a pawi ngawt mai. ‘Ka nu’ tih aiin ‘A nu’ tih chu kan thiam hmasak tir a, ‘Chaw ei rawh le’ tih mai tur a nih laiin ‘Mam mam ei rawh le’ tih chu nausen beng hriatah kan sawi rik tam zawk avangin a sawi thiam hma hauh atangin a thluakin a pawm fel daih tawh. Nausen lawmna atana “Thlapui rawn tla rawh, mamtea hian a awrh ang che’ kan tih atang hian kan nausen chhaih dan hi a ropui lutuk lo tih a hriat reng reng mai a, kan bansan a hun hle a ni.
|halai zingah ngei pawh mahni tawng vawnhim kawnga tan kan lak lohzia hi a pawi hnuah kan hre tan dawn chauh emaw tih mai tur a ni. Kan thalai tam takin a dik emaw an tih tawh mai turin kum tam tak an lo hman tawh; Eng nge tih aia Enge tih maite, Khawngaihthlak tih mai tur a nih laia Khawngaihthlakawm an ti kher te, nalh leh mawi an hman pawlh ta mai maite, tial leh rang pawh an hre hrang ta lote, an duh hun huna ‘rapthlak’ tih an han hmang ngawt maite, vat vat tih kan neih laia vat tih chauh kan han hmang tlatte, a Kohhran angte, a YMA angte tia ‘a’ kan hmang uar ta lutukte, ransa leh ramsa pawh kan thliar hrang ta lote, phel, bung, hlai tih leh paivat tih kan hman pawlh ta lutukte, Favah tih aia Fawvah kan ti tlatte, Tuthlawh leh Chemkawm kan hman pawlh ta mai thinte, Puan bih leh puan veng pawh kan hmang kawp ta mai maite, theihpatawp tih aia theihpalingkawh kan han hmang ta tlat maite, engtikah nge tih aia engtikin nge tih kan hmang tlat maite hi bansan a tawng dik zawk vawnhimna kawnga kan tan lak a ngai hle a ni.
Kan tawng ngeia ziak theih reng hnam dang tawng, a bik taka Sap tawnga ziak kan uar vangte: Hei hi tunlaia kan chin leh uar tak a ni. Kan tawng, Mizo tawng ngeia ziak theih tam takte hi Sap ttawnga ziak ta zawk kan tam ta riau mai hi thil tha lo tak a ni a, bansan ran a tha hle a ni. Heti taka sap tawng kan ngaisang a, kan hmang uar ta hi a chhan sawifiah thiam chu har hle mahsela kum sawmnga leh pasarih min lo awp tawh vang kha ni ngeiin a rinawm. Kum 1890 – 1947 chhung British (Kumpinu) sorkarin min awp khan min awp hneh hle mai a, kan kalphung zawng zawng tih deuhthaw min thlak danglam sak a, kan hnamin kum za tam tak kalphunga kan lo neih tawh Lal neia in awpna (Monarchy) chu thuneihna semzai a ni ta zawkin Zawlbuk pawimawhna zawng zawng chu min thlak danglamsak bawk a, Zu ngei pawh sualah min chhiarsak ta zel a nih hi. Khuang ngei pawh sualah min chhiarsak tak nain a hnu rei feah erawh Pathian chawimawina hmanraw pawimawh takah kan hmang leh ta tho a.
Kum 57 chhung min awp khan min awp hneh hle mai a, kan tisa pawn lam leh chhung lam zawng zawng thlengin hneh takin min awp a ni ber mai. Kan zia min thlak danglam sak a, anmahni zia chu min zirtir a, kan thiam lo a, kan thiam tak tak thei hek lo. Chuti chung chuan min awp tawh loh hnu thlengin an zia chu thiam tak tak thei chuang si loin kan la zir zel a, mawi zawk leh dik zawka hriatna chuan kan thinlungah bu ala khuar ta zel a nih hi. |awng lamah ngei pawh anmahni tawng chu ngaihsanna nen kan hmang ta zel a, kan pianpui tawnga ziah theih leh sawi theih reng pawh sap tawng khera sawi kan han tum ta zel mai hi anmahni sala inphuar leh tumna kawng khat a nih loh vek chuan atchilhna thlarauin min thuam hneh tawh vang pawh a ni hial zawk awm e. Kan incheina hnawl a, an incheina kan lo entawn a nih pawhin thil tha zawk kan duh tihna lamin a ngaih theihna a awm ngeiin a rinawm a, mahni pianpui tawng aia an tawng leh zel kan hmang uar ta lutuk hi chu ngaihsanna tha lo tak a ni zawkin a rinawm.
Kan naupangte ngei pawh Mizo tawng kan zirtir tam tawk loh vang: Hei hi phat rual lohin a dik a ni. Mahni pianpui tawng pawh ngai hlu hleithei loin Sap tawng kan hmang uar a, thiam tak tak loin thumal pakhat emaw hi kan han lam ri ve sek mai thin hi chu bansan a hun ta hle mai. A fiah duh zawkna avanga kan hmang a nih chuan sawisel rual a ni lo a, chuti pawh ni loa dik mang hlei loa Mizo tawnga sawi theih reng laia sap tawng kan han hmang thla zen hi chu hnung tawlh pawla mi ti awm tawk lek a ni awm e.
Kan fate’n zirna kawnga bul an tanna atan English medium-ah kan kal tir a, A AW B aiin A B C an rawn thiam hmasa zawk a, Dawhkan aiah Table an lam ri zing zawk a, Fiante aiah Spoon an lam ri zing zawk bawkin Mutna pindan aiah Bedroom an lam rik zin tawh avangin an pianpui tawng chu kum an tlin hnuin an han zir thar leh a, chuti takin an lo awlsam tawh si lo. Sumhmun hre lo tam takte chuan verandah an hre viau si a, Chawhmeh kan thiam loin chawhmeh fried chu an thiam viau bawk si avangin kumkhuaa Mizoram chhuahsan lo tur tih chiang ngawih ngawihte ngei pawhin Buh thlei an han thiam lo a nih chu. Heng zawng zawng hi nu leh pate thiam loh zawk a niin kan fate hi kan hnam zia leh kalphung mai bakah kan tawng ngei pawh kan zirtir tam tawk lo hi a pawizia kan la hre chho zel dawn ni pawhin a hriat.
Hetia kan han sawi avang hian hnam dang tawngte hi i hnualsuat ang u tihna a ni reng reng lo a, a bik takin Sap tawng phei chu keini hnualsuat hian awmzia pawh a nei pha kher lo ang. A hmanna hmun leh hun erawh kan thliar hrang thiam mai tur a ni a, Mizo tawng hre lo English mite zingah chuan thiam taka sap tawng hman kan tum tur a niin lehkha ziak leh thil pawimawh dangte pawh thiam taka hman chu kan tum tlat tur a ni. Chuti ni loa Sap tawng hmanna hmuna thiam tak tak mang si loin Mizo tawnga hman theihna hmun rengah pawh Sap tawng kan han hmang tlat zel hi chu thil tul lo tak a ni a, bansan vang vang chi a ni. Hawh teh u, kan Mizo tawng hi tawng mawi leh nalh tak a nih avangin i hmang uar deuh deuh ila, i tihhausak belh zel bawk ang u.
MIZO TAWNG HI A RAL MAI ANG EM?
