Daily Newspaper

MIZO THALAITE LEH UPSC CSE

49
                         Debbie Rinawmi

August ni 4, 2020(Thawhlehni) khan UPSC Civil Services Exam (CSE) 2019 result tihchhuah a ni a, mi 829 tling zingah SC leh ST atangin mi 67 an tling a, Mizo kan tel lo hlauh! Kum engemaw zat chu kan ‘nil’ tawh a, zawhna pawh mi tam tak rilruah a piang a, Social Media lamah te midang tana thurawn, thahnemngaihna leh demna ngawt lo chu chhanna fumfe tak a awm thei meuh lo.

Hlawhtlinna kawng hi mi hrang hrang zawt ta ila, heng- phurna leh nuam taka thiltih(passion), thawhrimna leh taimakna te hi an sawi tam ber tur a ni ang. Mizote hi inzir mi tak kan ni ngei ang- ziak leh chhiar kan thiamin A AW B kan neihna la rei loh ngaihtuahin hma kan sawn chak em em a; chhawr tlak leh mi thiam tak tak tam lo mah ila lehkhathiam chu kan kat nuk mai! Naupangin a zirlaiah phurna a nei em tih leh lehkhazir nuam a ti em tih lam en kan dawrhin lehkha a thiam chuan hna tak a thawk thei anga, nuamsa takin a awm thei ang tih hi nu leh pa tam tak rilru a ni tlat-hmangaihna kawng khat chu a ni tho tho e. Engpawh nise, hmanlai kan pi leh pute duhthusam ‘pialrial’ pawh kha faisa ring a hnathawk lova awm theihna nia an ngaih hmun kha a ni a, hnam taima tak kan ni lo a ni thei ang em? Hmanlai chuan nisa hnuaiah hna an thawk rim takzet a, nimahse hna kha an thawh a ngai tlat; hahthlak taka hna an thawh loh chuan ei tur an nei lo a ni mai dawn a, tun angin duhthlan tur la tam hek lo.

Mi tam takin Mizo thalaite an demna pakhat chu ‘intihhlimna (entertainment) an lawm lutuk a’ tih hi a ri ring khawp mai. Ni, a dik chiah a ni. Youtube viewers atang ringawt pawh hian a lang ek ek thei. Thil nuihzatthlak te, thawnthu lam te chuan entu nuai chuang an neih laiin zirna lam leh hma kan sawn theihna lam tur te, mi hlawhtling te chanchin te chuan entu tlem te chauh an nei thin. Heng kan tarlan tak te hi sawisel ngawt tur an ni lo va, miin a nuam tih zawng taka ei a zawn chuan hlawhtlinna pakhat a ni. Mi zawng zawng hi lehkha zira officer ni vek turin Pathianin min siam a rinawm loh a; a then ‘sports’ lamah an kal anga, a thenin lem an ziak anga, thla la pawl an awm anga, lo lam hnathawk pawl an awm anga, Pathian thu sawi pawl te an awm anga, ‘beauty pageant’-a tel pawl te pawh an awm ang chu. Chutih lai chuan kan hmuh loh hian heng exam lian beia inbuatsaiha inkhung hrang Mizo thalai tam tak an awm tih pawh kan ngaihtuah tel fo a tha ang a, ‘Mizo thalaite’ tia a hlawma sawi (generalize) leh thin hi a finthlak awm loh ve.

Mizo thalai tam tak urhsun leh nasa taka exam bei an awm lai hian engvangin nge hlawhtling an van em em thin? (UPSC exam bikah hian). Ni e, state pawnah coaching class to tak takin an kal a. Coaching class kal hi pass/tlinna a ni lo a ni ang! Thil reng reng chu thiam tak tak tur chuan a tobul leh a bul thut(basic) atanga hriat fiah a ngai a, chuvangin Primary School’ atangin a pawimawh chho vek tihna a nih chu. Mi tam tak chuan B.ED an tia, tun hma deuh phei chuan Institute of Advanced Studies in Education (IASE), DIET leh SCERT (special B.ED) ah chauh B.ED hi training theih a ni a (tun hnuah MZU-ah leh private universities hnuaiah correspondence a zir theih a ni tel ta bawk a, a lawmawm hle). Tun hma deuh te phei chuan seat a tlem a, zir pawh a buaithlak thin fu mai. An han zir chhuak a, thingtlang sawrkar sikul-a post tam tak chuan aikal an la ta thin a, trained chhuak leh qualified teacher te berin ai kal an lak leh daih si chuan khawnge zirna tha chu a awm ang? Kan vai hian kan pawimawh a nih ber chu!

Kan tum ram kan panna kawngah hian kan duhzawng leh nuam tihzawng thenkhat chu an hnawk thei hle a, chung zingah chuan social media hi a langsar pawl tak a ni ngei ang -a ngawl vei awlsam tak a lo ni lehzel nen! Rilru lam natna hial thlen theiin social media depression hial kan hmelhriat phah a nih hi. Social Media Depression hi psychiatrist-te’n social media vanga depression neite tan bik an phuah a ni a. Kan hriat loh leh ngaihtuah lem loh lai pawh hian social media kan hman hian midang nun leh kan nun tehkhin a awlsam em em mai a, hei vang hian mahni indiriamna te leh inhmuhsitna te a chhuak thin a, rilru hahna leh mahni nun hlut lohna a thlen thin. Heng ngaihtuahna hrang hrang-hlutna nei lova inhriatna te, beiseina neih loh riauna te, kan thil nuam tih thin nuam tih tawh loh te, mut tam lutuk emaw mut tlem lutuk te, chaw ei theih loh tih te, depression neite ang chiah an ni a, mahse social media atanga neih a nih avangin social media depression tih an phuah a ni (Psychology Mi Tin Tan, phek-207,209,210).

MCS kan neih zinga la naupang ber Lalnisai pawh khan kum khat chhung chu social media atanga biboin lehkha a zir! Kum 2018 UPSC CSE-a pangana, Srusthi Jayant Deshmukh pawh chutiang tho chu. Social media hi tangkai teh mah se, thil tak tak tih dawn chuan a lo hnawk a ni ang, mi hlawhtling tam takin an tum ram an panna kawnga an dah bo thin danah. Govt. Aizawl North College-a kan Associate Professor pakhatin kan graduate dawn tepa min fuihna “Hna in hmuh mai loh pawhin beidawng suh u, mi tin tan hun ruat a awm” a tih kha ka thinlungah hian a cham reng thin. A ni lah tak a, mi chuan kum 25 velah hna tha tak an neih a, nupui pasal neia chhungkua an din avang mai khan chutiang ang kuma an neih ang i la nei lo a nih pawhin mi hlawhchham ah inngai ngai suh. UPSC CSE 2019-a topper Haryana mi Pradeep Singh pawh a vawi li ngawt a beihnaah hlawhtlinna a chang chauh a nih hi. A pawimawh ber chu rilrua duhna tak tak nena beidawng miah loa kan hlawhtlin hmaa beih tang tang hi a ni.

UPSC CSE result chhuah ni hi khawtlangin kan sawia kan vei ni awmchhun a ni deuh mai em tih turin Mizo tling an awm loh avang maia indemna tawngka hi kan hre zing ta hle a. Primary school atanga kan tihdan a dik tawh loh avangin a inbuatsaihna kawng pawh a bumboh hle ang tih a rinawm. A inbuatsaih tak tak te phei hi chuan social media-a kan phun awl lo hi chhiarna hun an neih a rinawm lo tlang bawk. |henkhat chuan kohhran leh khawtlang kan dem a; kan khawtlangah hian mawhphawrhna zawng a tam teh meuh mai. Amaherawhchu heng mawhphurhna tam zawk nei ve lo hnamdang zingah pawh tih tak takna nei lo chu an tling chuang bik hauh lo va, chumi lehlamah chiah chuan heng mawhphurhnain a tihbuai lem loh fing taka hun insiam thiam mi hlawhtling tak tak kan Mizopui te ngei an awm tho bawk a ni. Chuvangin, mi tin hi central service a lut tura duan kan ni lo va, midang demna leh phutna hian a siam tha lo bawk a, kan hriat loh hian tih tak zeta exam bei an awm kum tin tih pawh theihnghilh lo bawk ila. Mi tin hian mawhphurhna kan nei a, system tha tak, mi rama an thatpui em em pawh hi hlemhletna(corruption) in a chiahpiah chuan rah tha a chhuah tak tak lo va. Keimahni zawn theuhah ram hmangaihna dik tak nena kan hna theuh kan thawh chuan rah tha duhawm kan hmuh ngei a rinawm.

THE AIZAWL POST – Article

HOME>> The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy