Mizo thalaite tana luhchilh
chia ngaih WSC luhchhuah
Minister B Lalchhanzova chuan Odisha khawpui Bhubaneswar-ah World Skill Centre (WSC) a tlawh a. Mizo thalaite tana zir theih chi tur thiam zirna hmun hi helama a changtu minister sawipui ngei a tum tih a sawi.
Bhubaneswar-a cham mek minister B Lalchhanzova hian Zirtawpni khan Mizoram larsap kalchhuak ta, Odisha larsap ni mek Dr Haribabu Khambampati chu Raj Bhawan ah a hmu a. Mizoram tan, a bikin thalai hna zawng mekte tana a thahnemngaihnaah lawmthu a a hrilh.
An inkawmna atanga larsap-in a lo kawhhmuh World Skill Centre (WSC) a tlawh zui a. WSC hi finishing school niin, ITI leh Polytechnic atanga zirchhuak leh thalai hna zawng laite trade hrang hranga an thiamna tah hriamna hmun a ni a. Mechanical engineering trade hnuaiah vertical transportation (lift, escalator), facility technology hnuaiah air conditioning leh cold storage, beauty and welleness bakah welding an zir.
Heng zirtirna hi zaa 80 chu practical-a kalpui anih vangin zirlaiten thiamna tak tak an nei a, hna zawn lamah pawh company hrang hrangin zirchhuakte an inchuh na hle thin tih WSC addl secretary Pinaki Patnaik chuan a lo hrilh.
Foreign ram hrang hrang leh India ram hmun hrang hrangah an hnen atanga zirchhuakte hian hlawh tha tak neia an thawh mek thu a lo hrilh a. Minister chuan WSC chu Mizoram thalaite tan a awhawm tih sawiin, LESDE minister sawipui a, thawh dun theih dan kawng zawn a duh tih WSC hotute hi a hrilh a ni.
Civil Supply minister B Lalchhanzova hian Odisha State Civil Supplies Corporation Limited (OSCSC) office tlawhin general manager K Sudarshan Chakravarthy, IAS nen an inkawm a. Odisha leh Mizoram-a buhfai, mipui hnena sem dan kalphung an sawi dun.
Odisha chu buha a intodelh bakah NFSA hnuaia an buhfai sem tur pawh an state thar an lei tih a lo hrilh a. Odisha-ah hian buh hum lei atanga her leh hralh thlengin Revenue department, remote sensing agency, Agriculture department, Cooperation department leh OSCSC an thawkho a, system tha tak an neih chu Mizoram pawhin zirchiang se thaa a rin thu minister hian a sawi a ni.
Mizo thalaite tana luhchilhchia ngaih WSC luhchhuah
