Site icon The Aizawl Post

MIZORAM AGRI-HORTI LEH IRRI OFFICER PENSION ASSOCIATION (MAHIOPEN)

By Lalhmangaiha Sailo
Holy Cross Bakery
Zotlang, Aizawl
Ph : 9436360275

Mizoramah NGO pawl lian leh ngelnghet tak pahnih YMA leh MHIP an awm a, khawtlang leh ram tan pawh an thawhhlawkin, an thlamuanpuiawm khawp mai. Hetih lai hian department hrang hrang ang chi te pawhin Pawl Association ngelnghet tak din in, phur takin pawl tan hma an la a.
Agriculture Department pawh hi tunhma department lian tak thin kha, hmun thumah Agriculture, Horticulture leh Irrigation Department-ah in hnaih te te a then darh a lo ni a. Hnathawktu Officers leh Staff te inpawh taka kan thawhzui leh kan awmho laiin, Officers pension hote chuan Association biru leh ngelnghet tak, a hmingah MAHIOPEN sain Association an lo din a.
A DIN TAN DAN : Agriculture-a Joint Director pension Pu H.Vanthuama a boral a, a vuina inkhawm leh thlalakpuitu beisei angin an tam lo a ni mai thei, hemi tuma tel Pu Lalbuaia, Pu C.Lalngaizuala te leh Pu Biakhranga te chuan, Officer Pension te hian Association kan din vat a tul a nih hi tiin, a senior ber Pu Lalbuaia, DAO (Retd.) kaihhruaiin dt.12.07.2008 ah pawl Association an din ta a ni.
Meeting hmasa ber dt.14.11.2008-a an neih tumin, an hruaitu atan heng mite hi Office Bearer-ah an thlang a : President – Pu Lalbuaia, DAO (Retd.), Vice President – Pu C.Lalngaizuala, Jt. Director, Secretary – Pu Z.Dengngura, Jt. Director (Retd.), Asst. Secretary – Pu Biakhranga, IFO (Retd.), Treasurer – Pu C.Lalmawia, AEO (Retd.), Finance Secretary – Pu Lalhmangaiha Sailo, AEO (Retd.), Adviser – Pu R.Thansanga, Director (Retd.).
MAHIOPEN Member tur hian Rs.50/- Membership Fee leh Rs.100/- Annual Fee pe in Officers Pension Circle atanga District leh Director thlenga Pension chhuak ten an rawn zawm zel a, rei lo te chhungin member intihlim tham kan tling thuai a, tunah chuan Membership Fee, Annual Fee, Life leh Patron Member thlenga siam thar niin, member pawh 89 lai kan ni ta. Constitution mumal leh rintlak tak neiin, sawrkar ah dan ang thlapa Association pawh register a ni.
HMALAK DAN TLANGPUI : Officer Pension-a lo chhuak thar te hi MAHIOPEN kan pawl rawn zawm nghal tura sawm – Membership Drive hi neih vat thin a ni.
1. Member boral inral: Kan Member boral inral hi kan ngai pawimawh ber niin, Member boral an awmin Rs.10,000/- in kan ral thin a. Ruang hi pangpar mawi takin kan thlah a, pawl aiawha thusawina hun hman thin a ni bawk. Inralnan hian pawisa fai bakah citation mawihnai tak pawl hminga hlan thin a ni. Nupui (kawppui) Sun an awmin Rs.5,000/- in kan inral thin thung.
Damlo refer leh damdawi in awmte intlawh in, a remchang leh tul angin pawl hminga damlo inkanna sumfaiin kan inkan (intanpui) thin.
2. In tlawhchhuah : MAHIOPEN Member senior, rual pawl tur pawha vakchhuak hlei thei tawh lo te, kan kual leh kawm hlim hi kan ngaih pawimawh em em a ni a. Programme mumal tak siamin a huho tein kan intlawh kual thin. Kum khatah vawi hnih te kan hman changte a awm thin. Aizawl khawpui chhung chauh lo, District hrang hrang thlenga hman thin niin, Member thenkhat te phei chu kum tam tak thawkho a, tu leh fate thlenga inngaina leh chhungkhat ang mai a lo khawsaho thin, Pension hnua kar hla taka awm ta te an awm a, hengho te tan tak te hian, tlawhchhuah programme te hi a hluin a tha tak zet zet a ni.
3. Field visit: He programme hi kum tin kan nei thin. District hrang hrangah Project pawimawh tak tak thawkzo hman lo, Pension san tak, hnunga mite rawn chhunzawm chhoh leh rah duhawm tak han hmuhna hun lo ni bawk nen, Official ni chiah lo mah se thawhpuite nen, inthlahrun tawnna awm miah loa kan inhmu leh, spot a hlim leh phur taka min lo dawngsawng thin te hi MAHIOPEN ti ropuitu leh member nih tinuamtu niin, senior tawh te min tichak thartu leh min tuaithar lehtu a ni. Hei hian sawrkar hmalak mek leh project te tlawh mai bakah mimal, mi taimate hmalaknate pawh tlawh tel zelin, Technical lama tanpui leh ruahmanpui an ngaihna laia pui thei zelin kan chhuak thin a ni.
4. General Conference : General Conference hi kum tin February thla chhung hian kan nei ziah thin. Programme hlimawm tak nilenga hmangin, tlaiah ruai kan thehho thin. Kumin hian ni 24 February, Zirtawpnia hmang turin inbuatsaih mek a ni. Member District hrang hrang atanga lokalte leh khawpui pawn lam te tan an motor kal man te tumsak an ni thin.
MAHIOPEN – He pawl hian khawtlang leh ram thlenga thil hriattham tur hmachhawp kan nei hran lo, inpho lan pawh kan tum lem lo, hei vang hian pawl (Association biru) te kan ti thla rawk a, tunah erawh hei kan inpholang chu a ni ta ber awm e. Khawtlang leh ram tana a tangkaina tur awm te pawh tlem azawngte chu pholang nual ila.
MAHIOPEN Member zingah hian mithiam Agriculture Scientist engemawzat, sawrkarin an thiamna leh an hriatna an la sawrfu zawh loh an la awm a, hengte hian kan ramin hmasawnna peng hrang hranga hma a sawn mek lai hian, a pawimawh ber ei leh bara intodelhna tur kawngah hian hun tlemte an la neih te hi hman tangkai han ni se a va tha dawn em!!! An service hun chhunga anmahni Technique ni lo ruahmansa thawk an ni chung pawhin tunhnai maia Oil Palm, Dragon Fruit, Serthlum, Lakhuihthei, Tomato leh Vegetable chi hrang hrangte ramdanga thawnchhuah tham tlem azawng kan han thar te hi a lawmawmin a ropui khawp mai. Hengte hi kan ramah kumtluanin gaps awm miah loa thar theih a nih te hi a takin thawk zelin lantir ila, kut hnathawktute hian an phu tawk rah seng zel ila, Mizote hi kan rinawmin kan thatchhe lo a ni tih te hi kan phochhuak ngei ang.
Tun kan sawrkar hun hmawr lamah kan tan hman lo a nih pawhin, kumtharah sawrkar tharah a bul atangin EI leh BAR intodelh hi hna pawimawh leh hmasa berah neih ni se.
Agriculture (Land Reform Policy) bul tan ila, a hlimthla kan hmu tawh a ni lawm ni. Hawh u, kan mithiam la hman loh hman mek leh hman tawh, sawrfu bang khal tha tak, kum hnih kum thum hman tlak la pai te kha, Zoram chhanchhuah nan in pawimawh lutuk. Officer on Special Duty thla khat a Rs.1/- hlawh a rawih te, rawngbawltu pension Agri Land use Policy nge engah nge!!! Lal leh thunei taka sawrkarin a chhawr thlak rawkte ai kha chuan in la tangkai dawn em a sin. Hei hi chu kan hlawhtlinpui loh bakah ei leh bar intodelhna tur atan chuan kawng dang tha leh hlawk zawk tur a awm lawng maw tia in sawi ruk sep sep thin Chakai Farm leh Telhawng Farm te chu kalsan in, hnathawk turte hlawkpui ngei tur Project hma la turin lo intuai tharin lo in-reserve hram hram teh u.
MAHIOPEN pawl chanchin sawiin a tawp lamah Zoram tan thil pawimawh ang reng tak kan tarlang ta nual a. Chhiartute hriatthiam beisei chungin MAHIOPEN dam reng rawh se. Go…go…go.

Exit mobile version