Ruatfela Nu
Thuhma: 2026-27 Mizoram Budget pun chhanah ZPM sawkara Adviser to CM (Finance) leh University lam mithiam sawi dan inang lo, social media site hrang hranga an khel deuh laih kha ka hmu a. Budget lam hi chu a technical ema a ngaihna ka hriat loh avangin ka ngaihven zui lem lo a. Chutih rualin vanneihthlak takin tunhnaiah Forest leh Budget/ Finance lam hre kawp pahnih, a hran ve vein an bula chettlatna hun remchang ka nei hlauh a. Ka vei zawng a nih tih hriain ISFR in ramngaw neih that teh nan ‘Open Forest’ a rawn hman/telh tak avanga budget pun dante min hrilh a. Forest nghenga awm Tribal tan chauh ni loin, state sawkar tan pawh Forest chu eizawnna nghial nghet leh sum hnar lian tak a nihna ka hre fiah nawn uar uar a, ka’n chik zui ve ta deuh a, ka dan pangngaiin mithiam khabe liam ka chang leh a, tahrik ni 03.03.2026 zingkar khan ZPM sawkarin he lama an hawlh lawr, TBC Lalvenchhunga, Adviser to CM Finance ka be bawk a: (Ani hi ka laichinpa a ni nghe nghe) ‘Budget pun chhan min hrilh rawh’ ka’n ti thawr a: Forest kan neih that vang a ni tel…tih a sawi lang lo. ‘Ka rawn ziak ang a, min rawn hnial dawn nia’ ka ti ta ngawt a.
Environment & Forest pawimawhzia Budget-ah a lang: Kum 7/8 kal tawhah khan, ramngaw kan hloh/chereu nasat vanga central atanga ‘Fund’ hrek theih dinhmunah kan ding tiin kan lo tlangau tawh a. India ram hi khawvela ramngaw hloh nasa ber zinga mi a nih vangin mi thiam leh ram hruaitute lu a hai a. Kawng hrang hrangin siam that (restore) dan an dap ruai ruai a: Finance Commission pawhin ramngaw humhalh tha lo state-te chu fund lama hrekna a kalpui khauh sawt hle a, Finance Commission-in central tax insem dan tur (devolution of taxes) a ruahmanaah Forest coverage a dah a. 14th Finance Commission khan weightage 7.5% a pe a. 15thFinance Commission phei chuan weightage 10% a pe ta hial a ni. Tunah Forest Survey Report (FSR) Forest Cover-a Open Forest a rawn chhiar hi kan vannei hle a ni.
Forest tehna chi hrang hrang: Forest Survey Report (FSR) sawifiah danin forest category chi hrang hrang a awm a: Very Dense Forest (70% aia tam thing hnah/zarin a hliahna area), Moderately Dense Forest (40-70% thing zar hliah.. canopy cover) leh Open Forest (10-40% thingzar hliah) te an ni. Forest area calculate nan hian hetiangin hian weight pek an ni leh a: 1 VDF, 0.65 MDF, & 0.30 OF.
E.g. Mizorama forest awm dan hi heti hi lo ni ta se: VDF 500 sqkm, MDF 200 sqkm leh OF 400 sqkm. Chuti a nih chuan forest area a chhut tur chu hetiang hian chawh chhuah a ni ang, 1×500+0.65×200+0.30×400 = 750 sq.km. Hetianga chawh chhuah kan state forest area chu state 28 te score belh khawmin sem a ni a, Mizoramin forest cover area a kan score tur chu a ni. Hei hi final Forest Area (FA) tiin lo sawi ta ila.
Hei bakah hian Forest Area (FA) pung te hi reward pek leh tur a ni bawk. Hemi atan hian kum 2015 leh 2023 inkara kan FA punna kha lak tur a ni. Kan state FA punna chu state 28 te punna zat belhkhawmin sem leh a ni ang. Area Growth (AG) a lo ni leh ta a. Forest area tlahniam emaw, pung lo te chu AG=0 pek an ni.
Tichuan Mizoram forest atanga kan score tur chu hetiang hian chawh chhuah a lo ni ta dawn a ni. 0.80×FA + 0.20 × AG
Heta lo chhuak hi 10% (or 0.10) in puntir leh niin chuta lo chhuak chu forest criteria a Mizoram final score tur a ni ang.
A hmaa dense forest chhiar tel thin bakah Open forest leh moderately dense forest chhiar tel a lo ni ta a. Kan state angah chuan chung lam atanga thla laka thingzar hliah chin han chhiar vek dawn chuan, a zau thei viau ang. Khua, kawngpui, leh hmasawnna hnathawhna tih loh chuan a lut thei deuh vek mai thei a ni. (Kumhlun thlai ho chinna pawh hi a tel thei deuh vek ang. ISFR Survey hi satellite base a ni tlangpui a). Kan state in central chhiah tlingkhawma kan share ve lo punna chhan nia langte hi Forest leh Contribution to GDP tehfung te hi an ni ang a. Forest hian a thawk hlawk viau ang.