Daily Newspaper

MIZORAM CHRISTIAN COLLEGE LEH A KAIHHNAWIH

17

Dr H LMalsawma
Former Director H&TE

Christian College Synod-in din a tum hi kum 40 hmalam mah kha a niin ka hria, khatih laia Jt Director leh Director of Higher & Tech Education ka nih lai kha chuan a din tura hma lo la se an tih te khan, min rawn ngun ve viau thin a, kan sawiho thin a, a chhan chu College din hi High School din ang mai mai hi a ni lo va, sum leh pai a ngaih nasatzia te, a behbawm a tamzia te, a buaithlakzia leh a harsatzia hriatchian kalh a ngaih a vang a ni ber a. Tunlaia College tharlam deuh T Romana College te, Johnson College te, Aizawl West College te, J Thankima College te, Zawlnuam College te, Mamit College te leh tlema upa deuh Hrangbana College te, Hnahthial College te, Khawzawl College te, Lawngtlai College te leh Siaha College tih ang reng te hi ka hun laia ka dinpui thin a ni a; dik taka sawi chuan a tir lamah chuan Zawlnuam College leh Mamit College te khu chu zirlai an hmu lo va, zirlai aiin zirtirtu an tam zawk daih a ni. Zirlai hmuh tam hi a har ber a, khawpui College-ah te pawh hian Subject combination azir hian naupang an tamin an tam lo thei a, University Grants Commission (UGC) rules-ah chuan naupang an tam emaw an tam lo emaw zirtirtu kha a ngai zat an awm vek a ni. Honours subject a awm chuan zirtirtu 4 an awm a ngai a, Pass Course a nih chuan zirtirtu 3 an awm a ngai a, zirlai pahnih khat chauh pawh awm se Honours an lak chuan zirtirtu 4 lai a ngai tho tho a ni. Tunah chuan Semester systema an kal tak avangin a danglam tawh mai thei e. High School angin Department pakhatah zirtirtu pahnih khat mai a lak theih loh. Tuna Mizoram Christian College-ah pawh hian, zirtirtu indaih tawk an lak loh chuan inspection neih hunah University lamin lak belh an rawt dawn tho tho va, a buaithlak hle ang. Library an han check ang a, a subject lehkhabu a tam tawk loh phei chuan UGC Norms anga tling lo an ni mai dawn a ni. Zirtirtu Qualification chu thu dang ni se Mizoramah hian College din tum hlawhchham ta hi an awm nual a ni. Ratu te, Darlawn te, Kawnpui te, North East Khawdungsei leh Thenzawl te pawh an ni a, an tum angin a awlsam lo a ni. Subject thlan dan hi a pawimawh ber a ni.

Kei chuan tuna Mizoram Christian College hi a hmingphuah hi hetianglo deuh hian phuah se ka duh a, entir nan Rev Dr Alywnes Roberts te pawh College zirtirtu tura chah chhuah liau liau niin ka hria a, tunah chuan min awmloh san tawh leh nghal a, a hming atan hian “ROBERTS MEMORIAL COLLGE” tih ni zawk se a inhmeh viauin ka ring a; tin, Christian College nih a bo chuang lo bawk. Baptist Kohhranin College an din dawn khan sawihonaah mi rawn sawm a, he sawihonaah hian India rama miropui Dr Rajaratnam, Serampur University-a Chancellor a dam chhunga ni tur leh Dr Mani Jakob, General Secretary All India Association for Christian Higher Education (AIACHE) te an lo tel a, Director ka nih angin College din dan phung ka sawi hawng a, an ngaithla thap mai a, Baptist Kohhran chuan an awlsam hle mai. A hming atan Higher and Technical Institutes in Mizoram (HATIM) an vuah a, a tuk lawkah an puitlin mai a ni. Mizoram University hnuaia College-ah pawh pakhatna an chang fo a ni. Keini Presbyterian Kohhran chuan kum 30 chuang kan khel a, din leh din lo turah thu mum kan nei hlei thei lo va, kan thutlukna hnuhnung berah chuan a harsat avangin din loh ni se kan ti tawh a, a lo ngaihven turin Pastor 3 lai an ruat tawh a, an ruat hnuhnung ber phei chuan kum 15 ngawt a lo mangnghilh der mai a, sawi nawn leh loh turah a ngai hial a ni awm e, tuna an lo din leh thar ta hi a lawmawm hle mai.

Baptist Kohhran College (HATIM) Principal hmasa ber hi kan nau Dr Chawngthanpari a lo ni kher bawk a, ka inah/Library ah a bung chawt a ni ber mai. Thu ka rawn ang apiangin a ti ringawt a ni ber mai. An dintirhin 5 Lakhs Kohhranten an sanction a, a buildingte chei a lo ngai nasa a, subject hrang hrang atan Lehkhabu lei te a lo ngai nasa a, University ho nen inspection kan va neih khan pawisa an sanction aia tam daih 30 Lakhs a hmang hman daih tawh a ni, hei hi Kohhranten an sanction leh mai a ni. T Romana College an din dawn khan Pu T Romana kha College din dan vel min sawipui turin zingah ka inah vawi engzatnge min rawn tura a lo kal ka sawi thei mai tawh lo. Ani pawh khan ka tih ang zelin a ti a a hlawhtling ta nge nge a ni. Aizawl West College an din dawn khan an Principal hmasa ber Rev Dr L N Ralte kha ka Office-ah a lo kal chamchi bawk thin. College din dan kha a bangbo ve hle thin a ni.

Subject Combination: Subject zir tur hi kan rama vang deuh tih loh tur a ni, dangdai deuh mi duh tur ni awma kan hriatte hi tih loh a tha, a chhan chu zirtirtu an vang duh kan hmu zo lovang, Polytechnic Institutes hi India ram District tina pakhat awm tura duan a ni a. Tun hma deuh khan Polytechnic Institutes pahnih Aizawl leh Lungleiah kan nei thin a, kan enkawl hneh lo hle mai, World Bank project awm lo phei se chu pakhat zawk kan thiat a ngai hial ang, tunah hian policy angin Polytechnic hi District 9-ah min rawn pe leh ang a, chuta zirtirtu tur leh a subject tur thlan chung changah buaithlak tak a awm a, ka hun lai khan Polytectnic Institutes 6 kan dil hauh lohvin min rawn pe a, a insakna tur vel min rawn pe vek nghal a, mahse luah lohvin Kel leh Bawng in mai maiah a chang ta a ni. A District-in a mamawh angin subject te chu kan han thlang ve bawk a, mahse Bhubaneswera High Tech Group of Institutions experience lo nei zawk te chuan an remti awzawng lo mai a, anni chuan “Hetiang subject thlang suh u, zirtirtu in hmu zo lovang, a pangngai thlang zawk rawh u,” an ti a, a dik khawp awm e. Anni hi Engeneering College M Tech zirna 6 lai nei an ni a, an zirtirtute pawh IIT Kharakpur leh IIT Delhi chhuakte an ni a, Polytectnic-ah subject thlan tur hi 1000 chuang ka nei a, Committee ah ka chhawp chhuak a, Mizorama la awm ngailo mi duh zawng tur ringawt ngaihtuahin kan thlang a, mahse a lo dik lo a ni. Lunglei leh Aizawla Polytectnic 2 chauh pawh enkawl zo lawi lo kan ni a, 8 dang chu hla tak a ni. Medical College ka rawn din sak ang che u ti tu High Tech Group ho hian, “PPP Mode in kan enkawl sak ang che u,” an ti na a, khatih laia kan hotute rilru an hneh zo lo aniang tunah chuan Polytechnic Building te chu a awm ta mai mai a, tunlai boruak Quarantine hmunah an hmang ta a, a tangkai viau tho ve.

Mizoram hi India ram State-a Engineering College leh Medical College nei lo awmchhun kan ni thin a, tunah chuan a hmingin kan nei ve der der ta a, Medical College leh Engineering Colleg kan dinsak ang che u tih kan hnial ta kha a pawi tak meuh meuh a ni. Mizoram Christian College-a subject kan introduce tur pawh hi Subject pangngai 6 a tel loh va BBA leh B Com te mi duh ang zawng tur kan ngaihtuah ringawt chuan a fel lo mai thei. Tunlai hian Sawrkar meuhvin Competition lama kan pachhiatzia te, a bikin UPSC hnuaia hna awm te bei tura Youth Comission hialten hma an lak lai hian subject thlan hi thiam a ngai hle mai, B Com leh BBA chu a tha tho va mahse Competitiona Mark scoring te Sociology leh Geography te telh a tha hle mai. Tin, India ramlaipui nena kan inhnaihna ber HINDI subject hi hmaih loh a tha, tunah hian Shillonga Synod College-ah hian 150 lai Mizo naupang an awm a, keimahni Thawhlawm thawhna Union Christian College ah khuan tam tak an awm bawk a, he College atan hian sum leh pai thawh tam ber kan ni na chungin Mizo Principal chu an duh der lo. Zirtirtu Qualification-ah hian duh ang kan hmu mai thei a, hmu lo mai thei bawk a, Rs 30,000/- (Singthum) fix hi chu a tlem deuh mai thei, tunah hian Middle School zirtirtu senior deuh pawhin Rs 1,50,000/- (Nuaikhat leh singnga) an hlawh tawh lai a, anmahni zirtir theitu ten Rs 30,000/- chauh an la dawn a nih chuan enchian deuh chu a ngaih hmel.

Kan kal peng deuh ta a, ka sawi tum ber chu College hming thu hi a ni a, Mizoram Christian College tih tlawng ai chuan “Robert Memorial College” tih ni zawk se chu a inhmeh awm mang e ka ti a ni. A hming tur hi hotuten vawi tam tak an chai tawh hnua an phuah a ni a, mahse tih danglam theih loh a ni chuangin ka hre lo. Khasi ho chuan tawi fel takin, “Synod College” an ti mai a, a tha then mai.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy