Mizoram Development Bank din turin CM-in a thlen

Union minister of state, Ministry of Finance Dr Bhagwad Karad chu Inrinni khan Mizoram chief minister Lalduhoma’n a kawm.
Mizoram Development Bank din theih dan tur a sawipui a. Sawrkar laipuiin interim budget atanga a lan dana SASCI atan sum tam zawk ruahman a tum chu lawmawm a tih thu hrilhin, Mizoram tana a kalpui dan awlsam zawk (special dispensation) awm thei se a duh thu a thlen. 16th Finance Commission funding dan turah chhiah lakkhawm tur nei tam lo tak a nih avangin special category state-a Mizoram dah zel turin a ngen.
Mizoram Rural Bank chu bank inzarpharh zau ber leh mipuiin an chhawr nasat, an CD Ratio tha thin tak a ni tih sawiin, thawktute allowance chu a sponsor bank SBI-a thawktute allowance zat pek ve nise tha a tih thu Lalduhoma hian a thlen a. Mizorama bank awm, a bikin Regional Rural Bank-a thawktu indaihlohna a nasat avangin Mizoram tan emaw hmarchhak puala thawktu lak runpui, special recruitment kalpui turin a ngen.
Mizoramah private bank an pun zel laiin, thingtlang lama an inzarpharh tlem avangin mipuiin an chhawr tangkai tawk lo, tiin, zau zawka an inzarpharh theih nan hma laksak turin a ngen a. Private bank awmsa hian an local branch-in sanctioning power an neih loh hlawm avangin hna an thawk chak thei loa, loan diltuten harsatna an tawk thin a. Mahnia sanctioning power an neih theih nan thuneitute ngensak turin a ngen bawk.
Bank thenkhatten an hnena loan diltute Income Tax Returns an lo phut thin tih chief minister hian a sawi a. Mizoram chu income tax pek lohna state a nih angin bank ho pawhin phut tawh lo se, tiin, hma laksak turin a ngen.
Mizorama bank tam zawk Credit Deposit Ratio a hniam hle a, mahni target tlin thei lo an tam hle tih hrilhin, mipui sum tlingkhawm chu mipui tan vek CD Ratio tha zawk an beisei tih Union minister hi a hrilh a. Mizoram sawrkar pawhin bank-ten an hnena loan diltute an rin ngam a, uar lehzuala loan an pek theih nan party mi duhsak tura ngenna emaw beneficiary atana thlan bik ang chite an kalpui loh tur thu a hrilh.
Chief minister thil thlen chu an pawimawh hlawm hle tih Dr Bhagwad Karad hian sawiin, ama awm lai ngei hian a kaihhnawih official-te telna tur thutkhawm, February 16-a nei tura kohna a tichhuak nghal a ni.